"Qarabağ" klubunun baş direktoru Əmrah Çəlikəlin Sportnet.az-a müsahibəsi
- "Valletta" ilə oyun haqda fikirlərinizi bildirərdiniz...
- İlk görüşdə minimal hesablı qələbə qazansaq da, qalib iki oyunun nəticəsinə görə müəyyən olunur. Ona görə də bu gün mənim oyun haqda nəsə deməyim düz çıxmaz. Tur bitdikdən sonra bunu bir yerdə dəyərləndirə bilərik.
- Böyük hesablı qələbə ola bilərdi. Ancaq xeyli sayda qol imkanları boşa verildi...
- Baş məşqçimiz Qurban Qurbanov bununla bağlı lazımi tədbirləri görər. Tək səlahiyyət ondadır.
- Reynaldonun xeyli qol imkanını boşa verməsini necə qarşıladınız?
- Reynaldodan çox razıyıq. Yaxşı futbolçu deyəndə hər vurduğu qol olan adam nəzərdə tutulmur. Belə olsa, gedib basketbol oynayardı. Qurban müəllim də razıdırsa, bu futbolçuya bir oyuna görə qiymət vermək düzgün deyil.
- Ümumiyyətlə hansı futbolçularınızı fərqləndirərdiniz?
- Uşaqlar hamısı meydanda can qoydu. Bu hesab heç nəyi dəyişmir. Yalnız cavab oyunundan sonra dəqiq danışa bilərəm.
- Yeni transferiniz Danilo Diasın oyunundan razı qaldınız?
- Futbolçuların çıxışı barədə fikir bildrməyim düzgün olmazdı. Çünki mən futbol mütəxəssisi deyiləm. Komandanın baş məşqçisi və məşqçiləri var. Təbii ki, son transferimizdən razı olmuşuq ki, onu heyətimizə cəlb etmişik.
- Rəşad Sadıqovun yoxluğunda müdafiədə qapıçı ilə anlaşmazlıqlar yaranırdı. Bu səbəbdən, Sadıqovu layiqincə əvəzləyəcək futbolçu almağı düşünmürsünüz?
- Rəşad tək müdafiədə yox, ümumiyyətlə, liderlik xüsusiyyətinə görə komandada fərqlənir. Əgər ehtiyac olarsa, təbii ki, transfer edilər.
- Nvbəti mərhələyə keçəcəyiniz təqdirdə yeni transfer düşünürsünüz?
- Qurban müəllim istəsə, əlbəttə, biz bunu edəcəyik. Təki mərhələ keçək.
- Rəqibin çıxışını necə dəyərləndirərdiniz?
- Rəqib zəif komanda deyil. Bizə ilk oyunda çox çətin anlar yaşatdı. Məncə, çəkinməyə dəyər. İnanırıq ki, cavab görüşündə azarkeş dəstəyimiz də yetərincə olacaq. İlk baxışdan, bizim xeyrimizə kimi görünsə də, çətin olacaq.
- "Qarabağ" çempion olanda kubokun Ağdama aparılacağı bildirilmişdi. Ancaq hələ ki xəbər yoxdur...
- İlk fürsətdə kuboku Ağdama aparacağıq. Kuboku Ağdama aparmaq məsuliyyətli bir işdir. Biz bundan imtina etmirik. Futbolçu və məşqçi heyətinin imkanı olan kimi bu işi görəcəyik.
- Avqustun 14-də Azərbaycan Super Kuboku uğrunda matçda "Neftçi" ilə üz-üzə gələcəksiniz. Bu, sizin qrafikinizə problem yaratmayacaq?
- İnşallah, yaratmaz..
Rövşən ƏHLİMANOĞLU
