"Neftçi" klubu Avropa Liqasının III təsnifat mərhələsindəki rəqibi Gürcüstan "Çixura"sı ilə 52 gün ərzində 4 dəfə qarşılaşmalı olacaq. Sportnet.az-ın məlumatına görə, bu komandalar hələ ötən ay Türkiyənin Bolu şəhərindəki təlim-məşq toplantısında 2 dəfə üz-üzə gəliblər.
İyunun 17-də keçirilmiş ilk görüşdə flaqman rəqibinə 2:3 hesabı ilə uduzub. Həmin oyunda "Neftçi"nin start heyətində cəmi 3 legioner - Saşa Stamenkoviç, Denis Silva və Kaue yer alıb. Qalan futbolçular - Elvin Bədəlov, Emin Mehtiyev, Məqsəd İsayev, Mirhüseyn Seyidov, Nicat Qurbanov, Samir Məsimov, Cavid İmamverdiyev və Ruslan Qurbanov gənclərdən ibarət olub. İlk yarıda flaqman Bakı "İnter"inin keçmiş futbolçusu David Odikadzenin qolu ilə geri düşsə də, Məsimov və Silvanın qolları ilə hesabda önə çıxıb. Lakin ikinci hissənin sonlarında Odikadze daha bir qol vurub və uzatma dəqiqələrində Tornike Mumladze yekun nəticəni müəyyənləşdirib.
Bundan 3 gün sonra "Neftçi" ilə "Çixura" arasında daha bir yoxlama matçı keçirilib. Bu dəfə isə oyun 1:1 hesablı heç-heçə ilə nəticələnib. "Neftçi"nin yeganə qolunu Culius Vobay vurub. Cavid İmamverdiyev isə 48-ci dəqiqədə penaltidən yararlana bilməyib. Digər tərəfdən, "ağ-qaralar"ın start heyəti ilk görüşlə müqayisədə fərqlənib. Qapını Emil Balayevin qoruduğu qarşılaşmada daha 4 yerli futbolçu Elvin Yunuszadə, Məqsəd İsayev, Mirhüseyn Seyidov və Samir Məsimov olub. Legioner qismində isə meydana Karlos Kardoso, Bruno Bertuççi, Kaue Sesilyo, Flavinyo, Julius Vobay və Ernest Nfor çıxıb.
İndi isə "Neftçi" "Çixura" iyulun 31-də "Bakcell Arena"da, avqustun 7-də isə Tiflisdəki Mixail Mesxi adına stadionda daha 2 oyun keçirməli olacaq. Amma növbəti qarşılaşmalar rəsmi xarakter daşıyacaq. Bununla belə, flaqmanın ilk 2 yoxlama matçından nəticə çıxaracağı şübhə doğurmur. Əsas nəticə isə odur ki, "ağ-qaralar" Gürcüstan təmsilçisinə yerli futbolçularla uduzduqları halda, daha çox legionerin yer aldığı heyət heç-heçəyə nail olub.
Qeyd edək ki, "Neftçi" ilə "Çixura" arasındakı oyunların başlama saatı hələ müəyyənləşməyib.
