Bakının "İnter" Peşəkar İdman Klubu sentyabrın 25-də 10 illik yubileyini qeyd edib. Sportnet.az-ın məlumatına görə, mərasimə idman ictimaiyyətinin 150-dək nümayəndəsi qatılıb.
Lakin nə AFFA-nın prezidenti Rövnəq Abdullayev, nə də klubun fəxri prezidenti Cahangir Hacıyev tədbirdə iştirak edib. "İnter"in baş sponsoru Beynəlxalq Bankın İdarə Heyəti sədrinin I müavini Emil Mustafayev, klubun prezidenti Georgi Nikolov və AFFA-nın baş katibi Elxan Məmmədov çıxış edərək, klubun keçdiyi yola, qazandığı titul və nailiyyətlərə nəzər salıblar.
Mərasim zamanı "İnter"in 2 dəfə çempion olduğu, "Birlik Kuboku"nu qazandığı, Premyer Liqada gümüş və bürünc mükafatçılar sırasına düşdüyü, eləcə də Avropa Liqasında son 2 mövsümdə mərhələ adladığı vurğulanıb və bununla bağlı videokadrlar nümayiş etdirilib. E.Məmmədov çıxışı zamanı "İnter"in Avroliqada bir neçə mövsümdə məhz penaltilər seriyasında mübarizəni dayandırdığını vurğulayaraq, komandaya uğursuz ənənəyə son qoymağı arzulayıb. Tədbirin rəsmi hissəsinin sonunda klubun tarixində xüsusi xidmətləri olmuş şəxslərə mükafatlar təqdim olunub.
Mərasimin ardından Nikolov Sportnet.az-a açıqlamasında Hacıyev və Abdullayevin əlamətdar hadisənin iştirakçısı olmamalarının səbəbini belə izah edib: "Bu, onların qərarıdır. Mən fəxri prezidentimizlə AFFA prezidentinin bu addımı ilə bağlı fikrimi bölüşə bilmərəm".
Bolqarıstanlı funksioner klubun fəaliyyətinin nə dərəcədə uğurlu olub-olmamasına futbol ictimaiyyətinin qiymət verməsini məqsədəuyğun sayıb: "Amma hər halda "İnter" titullu, aparıcı klublardandır. Bizim Premyer Liqada 2 dəst - bürünc, gümüş və qızıl medalımız var. Bu, 10 illik idman klubu üçün maraqlı statistika, kifayət qədər cəlbedici balansdır. Eyni zamanda aşağı yaş qrupları üzrə komandalarımız müxtəlif əyarlı medallara sahib olublar".
Nikolov AFFA baş katibinin arzusunun növbəti mövsümlərdə həyata keçəcəyinə və daha uğurlu çıxış edəcəklərinə inam ifadə edib. Onun fikrincə, ümidlə yanaşı, futbolçular da meydanda öz işlərini görməlidirlər.
