"Əvvəlcədən qarşımıza məqsəd qoymamışıq ki, qrupda ikinci yeri tutaq"

"Qarabağ"ın baş məşqçisi Qurban Qurbanov Ukrayna "Dnepr"i ilə Avropa Liqası matçından sonra mətbuat konfransı keçirib. Sportnet.az-ın məlumatına görə, 42 yaşlı mütəxəssis əvvəlcə oyun barədə fikirlərini bölüşüb...

- İstəməzdik ki, uduzaq. Təəssüf ki, məğlub olduq. Heç olmasa, 1 xala ümid edirdik. "Dnepr”in əsl gücünü hamılıqla gördük. Qolları düşünmədiyimiz səhvlərdən buraxdıq. Uşaqlara elə də iradım yoxdur. Kiyevdəki oyundan sonra da demişdim ki, bu qələbəni çox şişirtməməliyik.

- "Tvente” ilə səfər matçında qol buraxdıqdan sonra bərabərliyi təmin etmişdiniz. Bu dəfə isə ikinci qoldan sonra sonda heç-heçəyə nail ola bilmədiniz...

- Açığı, ilk dəqiqələrdən heç-heçəyə oynamadıq. Xüsusən, ilk dəqiqələrdən bu barədə düşünmürdük. Çalışırdıq ki, düzgün oyun göstərək və maksimum nəticəyə imza ataq.

- "İnter”in hücumçusu Mauro İkardi ilə Nikola Kaliniçi müqayisə edə bilərsiniz?

- Hərəsi fərqli oyunçulardır. Bu gün oyunu bəlkə də təkcə Kaliniç uddu. Ona gələn topların 90 faizi özündə qalırdı. Kaliniç ustalığını göstərdi. Hücumları daha çox onun üzərində qurmuşdular. Kaliniç "Dnepr”ə, İkardi "İnter”ə daha uyğundur.

- Sizə elə gəlmirmi ki, "Qarabağ”da kollektiv oyun sarıdan problem var?

- Bəlkə də kənardan belə görünə bilər. Dəfələrlə futbolçulara deyirəm ki, kollektiv oyuna üstünlük versinlər. Həmin epizodda Leroy Corcu görmək çətin idi. İnanmıram ki, ötürmə vermək istəmədi. Görsəydi, ötürmə verərdi.

- Növbəti mərhələyə vəsiqə şanslarınızı necə dəyərləndirirsiniz?

- Biz də azarkeşləri üzmək istəmirdik. Qələbə üçün əlimizdən gələni etməyə çalışırdıq. Hər bir rəqibə hörmət qoymalıyıq. Əvvəlcədən qarşımıza məqsəd qoymamışdıq ki, mütləq ikinci yeri tutmalıyıq. "Dnepr”lə oyunda qalib gəlmək daha çətindir, nəinki "Sent Etyen”i udmaq. Əlimizdəki imkanlardan maksimum yararlanmağa çalışırdıq. Hələ şansımız qalır.

- Futbolçularda azarkeş amili təzyiq göstərirdi. Demək olarmı ki, hazırkı komanda səfərdə daha rahat oynamağa qadirdir, nəinki evdə?

- Oyun sxemində bəlkə də problem var idi. Ola bilər ki, səfərdə hücumlarımızı başqa cür, burada fərqli qururuq. Bu, azarkeş sayından asılı deyil. Hər bir rəqibə qarşı fərqli hücumlar qurmağa çalışırıq. Son nöqtədə bəzi çatışmazlıqlar oldu. Taktiki sxemdə bizə mane olanı yoxdur.

- "Dnepr”in baş məşqçisi Miron Markeviç dedi ki, "Qarabağ” oyunu Reynaldonun üzərində qurmuşdu və onu zərərsizləşdirməyə müvəffəq oldular. Bu fikrə münasibətiniz necədir?

- Oyunu təkcə Reynaldo üzərində qurmamışdıq. Həm Maksim Medvedev, həm Leroy Corc, həm də Muarem Muarem tərəfdən hücumlar qururduq. Oyunun gedişində bəzi dəyişiklər etdik. Tam düşündüyümüz kimi alınmadıq. Həmkarım belə deyirsə və Reynaldoya qarşı xüsusi oynayırlarsa, hörmətlə yanaşmaq lazımdır.

- Sizə elə gəlmir ki, rəqib daha üstün oyun sərgilədi?

- Rəqib qalib gəldisə, hansısa epizodlarda bizdən üstün oldu və təbrik etmək lazımdır. Yenə öz fikrimdə qalıram: Düzgün oyun qurmağa çalışırıq. Rəqibin təzyiqi bəlkə də bizdən çox oldu. Hər komandaya qarşı fərqli oyun üslubu ilə çıxış edirik. Hər şey düşündüyümüz kimi alınsa, asan qalib gələrik. İkinci hissənin ortalarında topa nəzarət edə bilmədik. Ona görə Almeydanı bir az arxaya çəkdik. Necə alındısa, özünüz gördünüz.