"Neftçi"in baş məşqçisi Arif Əsədov əvəzedici heyətə göndərdiyi futbolçu Ernest Nforu bir həftədən sonra əfv edib. Sportnet.az-ın klubun rəsmi saytına istinadən məlumatına görə, 29 yaşlı hücumçu baş məşqçiyə müraciətindən sonra bağışlanıb.
Kamerunlu forvard özünü sübut etmək üçün baş məşqçidən ona şans verilməsini istəyib. Öz növbəsində məşqçilər korpusunun təqdimatına əsasən, futbolçunun əsas komandaya qaytarılmasına qərar verilib. Bu zaman E.Nforun əvəzedici komandanın məşqlərində səylə iştirak etməsi, meydana çıxdığı oyunlarda fərqlənməsi və son iki qələbədə pay sahibi olması nəzərə alınıb.
Qeyd edək ki, Ernest Nfor bir müddət öncə məşqlərdə və oyunlarda peşəkar səviyyəsindən aşağı çıxış etməsi və intizamsızlığı səbəbindən məşqçilər korpusunun təqdimatına əsasən əvəzedici heyətə göndərilib.
