Azərbaycan milli komandasının baş məşqçisi Berti Foqts DÇ-2014-ə ABŞ yığmasının məsləhətçisi kimi yollansa da, Qana ilə qarşılaşmada həmkarı Yurgen Klinsmanla yanaşı əyləşməyib. Sportnet.az-ın məlumatına görə, Klinsmann Foqtsun oyunlar zamanı tribunada yer alacağını açıqlayıb.
Gənc mütəxəssis bildirib ki, həmkarı hissələrarası fasilə zamanı paltardəyişmə otağına gələrək, öz analizlərini təqdim edəcək: "Çox şadıq ki, Foqts bizə 2 ay ərzində kömək edəcək və rəqiblərimizi izləyəcək. Bu, bizim üçün şərəfdir. O, böyük təcrübəyə malikdir və Almaniya millisinə titul qazandıran son baş məşqçidir".
Qeyd edək ki, Berti Foqtsun rəhbərliyi altında Almaniya yığması 1996-cı ildə İngiltərədə keçirilmiş Avropa çempionatının qalibi olub.
