Son turda “oyunlar” oynanılacaq?

Sabah Topaz Premyer Liqasında sonuncu turun qarşılaşmaları keçiriləcək. Sportnet.az-ın məlumatına görə, böyük ölçüdə heç bir məna kəsb etməyən bu 5 qarşılaşmadan bəziləri bir neçə komandanın turnir cədvəlindəki son durumuna aydınlıq gətirəcək.

"Xəzər Lənkəran” – "Qarabağ”

Qarşılaşma Lənkəranda deyil, Bakıda baş tutacaq. Məğlub olacağı təqdirdə ən pis halda 1 pillə geriləyərək, çempionatı 7-ci mövqedə bitirəcəkləri məyyənləşən cənublular ev oyununu səfərdə keçirməyə razılaşıblar. Çempionluğu bayram edən "Qarabağ” əsas oyunuçularına istirahət verəcəyi də indidən məlumdur. Böyük ehtimalla, bu 90 dəqiqədə tərəflər ya "sülhsevərlik” nümayiş etdirəcəklər, ya da nominal meydan sahibləri minimal hesablı qələbə qazanacaqlar.

AZAL – "İnter”

AZAL növbəti mövsümün planlarını cızdığı halda, "bankirlər” gümüş medalların dadını çıxarmaqdadırlar. Yuxarıda qeyd etdiyimiz görüşlə bu qarşılaşmanın bənzərliyi ondan ibarətdir ki, burda da ev-səfər komandalarının yerləri dəyişdirilib. Qarşılıq? Yəqin ki, bunun qarşılığında "İnter” AZAL-a qarşı gənc heyətini buraxıb, rəqibə minimum 1 xal qazanmağa imkan yaradacaq. Yoxsa, "təyyarəçilər”in nəyinə lazım idi isti ocaqlarını tərk edib, "Şəfa”da oynamağa razılıq versinlər?

"Simurq” – "Neftçi”

Şayiələrə inansaq, "Neftçi” Zaqataladan əliboş dönəcək. "Qəbələ”yə bürünc medalları güzəştə getməklə, ölkə Kubokunu barter etmək barədə söhbətlər səngimək bilmir. Həqiqətdə necə olacaq? "Simurq” üçün oyunun heç bir əhəmiyyəti yoxdu. Ancaq son turda "Neftçi” kimi adlı-sanlı rəqib üzərində qələbə qazanmaq Zaqatala təmsilçisi üçün göydəndüşmə olar.

"Rəvan” – "Bakı”

"Rəvan”ın baş məşqçisi Güvənc Kurtar bir müddət öncə saytımıza verdiyi müsahibədə cari mövsümün yekunlarına görə heç bir klubun elitanı tərk etməyəcəyinə əmin olduğunu bildirmişdi. "Od olmayan yerdən tüstü çıxmaz”. Böyük ehtimalla AFFA-da bununla bağlı şıfahi qərar qəbul edilib. Sadəcə, rəsmən hələ ki, bu, öz əksini tapmayıb. Belə olan halda hər iki tərəf üçün oyunun əhəmiyyəti itir. Lakin sonuncu pilləni tərk etmək şansını saxlamaq üçün "Rəvan”a bu qarşılaşmada mütləq qalib gəlmək lazımdı. Alınacaqmı? İfaçılara nəzər saldıqda, əlbəttə ki, paytaxtın eyniadlı klubu daha şanslı görünür. Ancaq ölkə Kuboku da göstərdi ki, "Bakı” qeyri-sabit komandadır və "Rəvan” bu oyundan qalib ayrıla bilər.

"Qəbələ” – "Sumqayıt”

Bəlkə də yeganə oyundur ki, hər iki komandaya xallar lazımdır. Meydan sahibləri tarixlərində ilk dəfə bürünc medallara yiyələnmək şanslarını saxlamaq üçün qalib gəlməlidirlər. Aqil Məmmədovun yetirmələri isə elitadakı mövqelərini rəsmi şəkildə qorumaq üçün ən azından 1 xal qazanmalıdırlar. Hər halda "stavkasevərlər”i bu oyuna ehtiyatlı yanaşmağa çağırardıq. Niyə? "Sumqayıt” – "Qarabağ” "oyunu”nu xatırlayın. "Qəbələ” artıq avrokuboklara vəsiqəni təmin edib. Azərbaycan futbolunda isə totalizator rəsmiləşəndən bəri, nədənsə, sesnsasiyaların sayı artıb.

Ceyhun ƏLİYEV