Azərbaycan Triatlon Federasiyası (ATF) ölkə idmanı tarixində ilk dəfə baş tutacaq beynəlxalq "İronman 70.3 Baku" yarışı ilə əlaqədar təqdimat keçirib.
Sportnet.az xəbər verir ki, "Four Seasons" otelində təşkil olunan toplantıda gənclər və idman naziri Fərid Qayıbov da iştirak edib.
Mətbuat konfransına nazirlə yanaşı, Azərbaycan Triatlon Federasiyasının prezidenti Fərid Fərhadzadə, "İronman" qrupunun EMEA üzrə vitse-prezidenti və baş direktoru Tomas Veye Olsen, EMEA üzrə nümayəndəsi Alberto Qarrica, EMEA üzrə regional direktoru Henrik Brovell və MDB üzrə eksklüziv "İronman" lisenziya sahibi Nurlan Abduov qatılıblar.
Məlumat verilib ki, yarış 2026-cı il sentyabrın 5–6-da keçiriləcək və "İronman 70.3", "Fun Run 5 km" və "İronkids" yarışlarını əhatə edəcək.
1.9 kilometrlik tək dövrədən ibarət üzgüçülük mərhələsi Xəzər dənizinin sahilində baş tutacaq.
90 kilometrlik velosiped mərhələsi 2 dövrədən ibarət olacaq. 3 dövrədən ibarət qaçış yarımmarafonu isə 21,1 kilometri əhatə edəcək.
Federasiya prezidenti Fərid Fərhadzadə jurnalistlərə açıqlamasında deyib: "2026-cı il sentyabrın 4–6-da sakinlər və qonaqlar üçün əyləncə proqramı, "İronman EXPO" zonası təşkil olunacaq. Ziyarətçilər rəsmi "İronman" məhsulları və digər idman ləvazimatlarını əldə edə biləcəklər.
İndiyədək Bakı şəhəri bir çox beynəlxalq yarışa ev sahibliyi edib. Onlardan biri də gələn il sentyabrın 5-də start götürəcək "IronMan" brendi altında 70.3 yarışı olacaq. Bu turnirdə 2 500 atlet iştirak edəcək. Üzgüçülük, velosipedsürmə və qaçışdan ibarət triatlon yarışında idmançılar öz güclərini sınaya bilərlər. Eyni zamanda, turnirə minlərlə tamaşaçı gələcək. Onlar əsl idman bayramının şahidi olacaqlar.
Cənab Prezident İlham Əliyev tərəfindən idmana xüsusi diqqət göstərilir və idman infrastrukturu yaradılıb. Biz də bu infrastrukturdan bəhrələnərək triatlonçuları Bakıya dəvət edərək yarış keçirməyi qərara gəldik".
