Bakıda səfərdə olan Dünya Güləş Birliyinin (UWW) prezidenti Nenad Laloviç Azərbaycan yığma komandalarının təlim-məşq bazası - Olimpiya Güləş Mərkəzində olub.
Sportnet.az xəbər verir ki, Azərbaycan Güləş Federasiyasının (AGF) I vitse-prezidenti Firdovsi Umudov UWW prezidentinə Olimpiya Güləş Mərkəzi və burada yaradılan şərait barədə məlumat verib. F.Umudov bildirib ki, Olimpiya Güləş Mərkəzi daim idmançılara dəstək göstərən dövlət başçısı, Milli Olimpiya Komitəsinin prezidenti İlham Əliyevin həyata keçirdiyi idman siyasətinin tərkib hissəsidir. Dünyanın ən böyük təlim-məşq bazalarından biri olan bu mərkəzdə yerləşdirilmiş 14 güləş xalçasında eyni zamanda hər üç güləş komandasının məşq etmək imkanı var. Olimpiya Güləş Mərkəzi idmançıların hazırlıq prosesi üçün bütün lazımi infrastrukturla, məşq ləvazimatları, trenajorlarla təchiz olunub. 2012-ci ildən etibarən Azərbaycan güləş yığma komandaları ilə yanaşı, dünyanın aparıcı güləş ölkələrinin komandaları da burada təlim-məşq toplanışları keçir.
N.Laloviç idmançıların beynəlxalq arenada əldə etdiyi nailiyyətlərin kökündə yüksək hazırlıq şəraitinin olduğunu və bu baxımdan Azərbaycan güləşçilərinin şanslı olduğunu deyib: "AGF-nin belə bir təlim-məşq bazasına sahib olması UWW olaraq, bizi çox məmnun edir. Azərbaycan qədim güləş ənənələrinə malik ölkədir. Ölkənizdə idmana, xüsusən güləşə böyük maraq var. Biz AGF-nin UWW-dəki mövqeyini yüksək qiymətləndiririk. Güləşçilərinizin daim yüksək əyarlı medallara iddialı olması məhz ölkə rəhbərliyi və federasiya tərəfindən yaradılan şəraitdən qaynaqlanır".
Qeyd edək ki, Nenad Laloviç bu gün Rusiyanın Kaspiysk şəhərində start götürəcək güləş üzrə Avropa çempionatına yola düşəcək.