Azərbaycan cüdoçuları Aişə Qurbanlı və Əliyeva Leyla bu gün Belarusun paytaxtı Minskdə start götürən açıq Avropa Kubokunda bürünc medal uğrunda görüşdə bir-birinə rəqib olublar.
Sportnet.az xəbər verir ki, 48 kq çəki dərəcəsində mübarizə aparan idmançılar fərqli şəkildə "bürünc" uğrunda görüşə vəsiqə qazanıblar. Qurbanlı 1/8 finalda rusiyalı Kristina Bulqakovanı, ardınca isə britaniyalı Kelli Stadonu məğlub etsə də, yarımfinalda qazaxıstanlı olimpiya mükafatçısı Otqonseseq Qalbadraxa uduzub.
Əliyeva isə 1/8 finalda italiyalı Elis Adrastini üstələsə də, rusiyalı Tatyana Ayakinaya uduzub. O, təsəlliverici görüşdə belaruslu Yevgeniya Şaloikaya qalib gələrək Qurbanlıya rəqib olub.
Qeyd edək ki, Azərbaycanın bu gün mübarizə aparan digər 7 cüdoçusu - Elbrus Zamanov, Timur Boyev, Tərlan Kərimov (hamısı 66 kq), Şəfəq Məmmədova, Gülşən Nəzərova (hər ikisi 52 kq), Purevsuren Buyanxişiq və Səkinə Zayirova (hər ikisi 57 kq) fəxri kürsüyə yüksələ bilməyiblər.
