"Qarabağ"ın baş məşqçisi Qurban Qurbanov Azərbaycan Kubokunda səfərdə "Araz-Naxçıvan"a qarşı keçirdikləri ilk yarımfinal oyununda emosional davranışı ilə diqqət çəkib.
Sportnet.az xəbər verir ki, 24-cü dəqiqədə Ağdam komandasının əlcəzairli legioneri Yassin Benzia topu uzaqlaşdırmaq istədiyi vaxt Naxçıvan təmsilçisinin futbolçusu İssuf Paronun ayağına zərbə endirib.
Burkina-fasolu müdafiəçi zərbədən yerə yıxılıb və həkimlər ona ilkin yardım göstərib. Baş hakim Elçin Məsiyev VAR-ın müdaxiləsindən sonra epizodun təkrarına baxıb və penalti qərarı verib.
Bu zaman Qurbanov qərardan narazılığını kəskin formada bildirib. O, özü də əlindəki planşetlə epizodu izləyib və dördüncü hakimə etiraz edib. Daha sonra baş məşqçi planşeti kənara atıb.
Penaltini dəqiq yerinə yetirən Felipe Santos hesabı açıb.
Qeyd edək ki, hazırda "Araz-Naxçıvan" öndədir - 1:0.
