Serbiyanın paytaxtı Belqradda keçirilən UEFA-nın 49-cu Sessiyasında İcraiyyə Komitəsinə seçki keçirilib.
Səsvermə nəticəsində 7 nəfər növbəti 4 il müddətinə üzv seçilib.
Frank Pauv (Niderland) 49, Qabriele Qravina (İtaliya) və Hans-Yoahim Vatske (Almaniya) hərəyə 48, Mariyan Kustiç (Xorvatiya) 42, Arye Lahti (Finlandiya) 41, Ayvar Pohlak (Estoniya) 37 və Armen Melikbekyan (Ermənistan) 29 səslə bu hüquqa yiyələnib.
Sezari Kuleşa (Polşa) 21, Huqo Kvaderer (Lixtenşteyn) 19, Dominik Blan (İsveçrə) 11, Pedru Proensa (Portuqaliya) 7 səs toplayaraq, İcraiyyə Komitəsindən kənar qalıblar.
Devid Hill (İngiltərə), Karl-Erik Nilsson (İsveç) və Karl-Haynts Rummenigge (Almaniya) İcraiyyə Komitəsinin fəxri üzvləri, Razvan Burleanu (Rumıniya), Georgios Kumas (Kipr), Brend Nöyndorf (Almaniya), Deyan Saviçeviç (Monteneqro) və Paskal Van Damm (Belçika) isə 4 il müddətinə FIFA Şurasının Avropadan olan üzvləri seçiliblər.
Ümumilikdə 55 ölkənin nümayəndələri səsvermədə iştirak edib.
Xatırladaq ki, UEFA-nın Konqresində Azərbaycanı AFFA-nın icraçı vitse-prezidenti Sərxan Hacıyev, baş katib Cahangir Fərəcullayev və icraçı vitse-prezidentin müşaviri Orxan Əhmədov təmsil edir.
