"Qarabağ"ın Macarıstan "Ferentsvaroş"u ilə keçirdiyi UEFA Çempionlar Liqasının pley-off mərhələsinin cavab görüşünü izləməyə azarkeş kimi yollanmışdıq.
Vaxtından bir saat tez çatsaq da, Tofiq Bəhramov adına Respublika stadionunun qarşısı qələbəlik idi. Bu, təkcə oyuna girmək istəyən azarkeşlərə yox, həm də tribunaların önündə fəaliyyət göstərən ketrinq şirkətlərinə görə idi. İnsanlar növbəyə düzülərək, həmin "müvəqqəti obyektlər"dən ərzaq almaq istəyirdilər.
Biz də bu məqsədlə həmin obyektlərdən birinə yaxınlaşdıq. Satıcıdan qiymətləri soruşanda eşitdiyimiz məbləğlər bizi xeyli təəccübləndirdi. Təsəvvür edin ki, stadionun çölündə "Gənclik" metrosunun çıxışındakı qiymətlərlə müqayisədə 3 dəfə baha satırdılar.
Hansı ərzaqları? Qiymətləri yazaq, siz də agah olun:
Kiçik ölçülü çips - 4 manat
0,5 litrlik adi su - 2 manat
0,5 litrlik soyuq çay (Ice tea) - 3 manat
Sosiska buterbrod - 6 manat
Xırdalan pivəsi - 8 manat
Bunlar hələ qiymətlərini soruşduqlarımızdır.
Beləliklə, 2 çips və 2 ədəd soyuq çay üçün ümumilikdə 14 manat kartla ödəyərək, keçdik tribunaya.
Sonradan kartla ödəniş etdiyimiz POS-terminalın hansı şirkətə məxsus olmasına baxdıqda, nə görsək, yaxşıdır? Bizim bu "RDC MMC".
Bəli, düz tapdınız, "İmişli" klubunun baş sponsoru. Oynamağa baş məşqçi və futbolçuları xaricdən tapan, amma stadion tapmayan şirkət. Özləri ilə əlaqə saxladıqda da təsdiqləndi ki, bəli, elə onlar imiş...
Deməli, RDC qat-qat bahalı ketrinq xidmətləri ilə də məşğul imiş.
"Qarabağ" oyun üçün ən ucuz qiyməti 5 manata qoyur ki, insanlar çöldə qalmasınlar, hamı oyuna gələ bilsin. Amma bunlar hər azarkeşdən bir biletin qat-qat artığını çıxarırlar. Başqa sözlə, oynayan "Qarabağ", qazanan RDC.
Deməli, təkcə futbolda belə deyilmiş. Yəni, "Qarabağ" yalnız futbol oynamaqla digər klublarımıza pul qazandırmır... Həm də bundan şirkətlər də ən azı "Qarabağ"ın biletdən qazandığı qədər gəlir əldə edirlər.
Bilirsinizmi niyə? Çünki metronun üstündəki market və kafelərdən ərzaq alıb stadion ərazisinə keçirməyə icazə verilmir. RDC kimi şirkətlər də məhz bundan gen-bol istifadə edirlər.
Bazar olsun!
