İslandiya mlllisi Azərbaycan yığmasına qarşı 2026-cı il dünya çempionatının seçmə qrup oyununa futbolçu itkisi ilə çıxacaq.
Sportnet.az-ın məlumatına görə, komandanın keçmiş kapitanı Aron Eynar Qunnarsson cəza üzündən açılış matçını buraxacaq.
36 yaşlı dayaq yarımmüdafiəçisi martın 23-də Kosovoya qarşı UEFA Millətlər Liqasının keçid pley-off oyununda iki sarı vərəqənin ardından "qırmızı" ilə cəzalandırılaraq, meydandan kənarlaşdırılıb.
UEFA İntizam Komitəsi ona bir oyunluq cəza kəsib. Qunnarsson cəzasını məhz Azərbaycanla oyunda çəkməli olacaq.
Baş məşqçi Arnar Qunnlauqsson hazırda Qətərin "Əl Qarafa" klubunda çıxış edən təcrübəli futbolçunu qarşıdakı oyunlar üçün açıqladığı heyətə daxil edib. Yarımmüdafiəçi Azərbaycanla oyunda olmasa da, Fransaya qarşı matçın iştirak ərizəsində yer ala biləcək.
Qeyd edək ki, Aron Eynar Qunnarsson İslandiya millisində 2 fevral 2008-ci ildə debüt edib. O, uzun llər - o cümlədən, 2016-cı il Avropa və 2018-ci il dünya çempionatlarında yığmanın kapitanı sarğısını daşıyıb. Hazırda komandanın kapitanı Orri Oskarssondur.
İslandiya Azərbaycan millisi ilə sentyabrın 5-də evdə, Fransa ilə sentyabrın 9-da səfərdə üz-üzə gələcək. Hər iki oyun Bakı vaxtı ilə saat 22:45-də başlanacaq.
