"Şanslarımızı dəyərləndirmək çətindir. Amma səfərdə oynadığımızı nəzərə alsaq, deyərdim ki, 50/50 nisbətindədir. İstənilən halda, bura qələbə üçün gəlmişik və bizə heç olmasa, evimizə 1 xalla dönməyimiz lazımdır".
Sportnet.az-ın məlumatına görə, bunu Danimarka "Kopenhagen"inin baş məşqçisi Yakob Neestrup Bakıda "Qarabağ"a qarşı keçirəcəkləri UEFA Çempionlar Liqasının Liqa mərhələsinin II tur matçından əvvəl mətbuat konfransında deyib.
47 yaşlı mütəxəssis Liqa mərhələsinə təsnifatdan gələn komandalara daim hörmətlə yanaşdığını bildirib: "Rəqibimiz də böyük yol keçib. Əlbəttə, onların oyunlarını diqqətlə izləmişik. Xüsusən, Macarıstan "Ferentsvaroş"una qarşı yaxşı çıxış etdilər və bu komandanı layiqli şəkildə pley-off mərhələsində Çempionlar Liqasından kənarlaşdırdılar. "Qarabağ"ın hücum xəttində yaxşı oyunçular var və onlar hücuma keçidlərin öhdəsindən yaxşı gəlirlər. Görünür, bu komanda Avropada oynamağa alışıb. Düzdür, son illər Çempionlar Liqasında çıxış etməyiblər, amma müntəzəm olaraq avrokuboklarda, xüsusən, Avropa Liqasında oynayıblar. Buna görə də belə bir kollektivə ciddi yanaşmaq lazımdır. Biz də həmişə bu cür yanaşırıq. Bu, illərdir topladığımız Avropa təcrübəsinin bir hissəsidir".
"Kopenhagen" "Qarabağ"la oyundan 2 gün əvvəl Bakıya gəlib və matçdan dərhal sonra yox, ertəsi gün axşam saatlarında Azərbaycanı tərk edəcək. Neestrup bunun səbəbini belə izah edib: "Biz elə bu gün gələ və oyundan dərhal sonra qayıda bilərdik. Lakin bu dəfə qərara gəldik ki, bazar ertəsi gələk və oyundan sonrakı gün axşamadək gözləyək. Bu, bir tərəfdən ona görədir ki, oyuna hazırlığın ən yaxşı yolunun belə olduğu qənaətinə gəldik. Üstəlik, çempionatda "Midtüllan"a qarşı bazar günü keçirəcəyimiz ev oyununadək hələ iki günümüz var. Habelə, oyunçuların Tofiq Bəhramov adına Respublika stadionunu sınaqdan çıxarmaq imkanı oldu. Çünki burada heç də yaxşı ot örtüyü yoxdur. Ot örtüyü daha yaxşı ola bilərdi. Amma bu barədə danışmayaq. Çünki şərtlər hər iki komanda üçün eynidir və bu, bəraət qazanmağa xidmət edə bilməz. Əlbəttə, biz belə bir halla qarşılaşmalı olacağıq. Lakin yoluna qoymalıyıq".
Qeyd edək ki, oktyabrın 1-də keçiriləcək oyun saat 20:45-də başlanacaq.
