"Oyunçular və komandamla həddindən artıq qürur duyuram. Oyuna yaxşı girə bilmədik. Bu da rəqibin həddindən artıq çətin və sərt olması ilə bağlı idi. Buna baxmayaraq, özümüzdə də əminlik var idi ki, hər an heç-heçə edə və hətta oyunu öz xeyrimizə çevirə bilərik. Bunu da oyunçularım əzmkarlıq sayəsində etdilər".
Sportnet.az-ın məlumatına bunu "Neftçi"nin baş məşqçisi Samir Abasov səfərdə "Zirə" ilə 2:2 hesablı heç-heçə etdikləri Azərbaycan Premyer Liqasının VII tur matçından sonra mətbuat konfransında deyib.
47 yaşlı mütəxəssis bildirib ki, oyunçularını təkcə meydana hazır etməli deyillər: "İndiyədək "Neftçi"ni əzmkarlığının və qələbə ruhunun olmamasına görə tənqid edirdilər. Bunları artıq komandaya qaytarmışıq. Alınlarından öpürəm, sağ olsunlar. Nəticəni və qazanılan xalı qoyaq kənara, futbolçularımdan həddindən artıq razıyam. Bəllidir ki, çempionatda oyunlarımızı təkcə həftəsonu qarşılaşmalarına hazır etməyəcəyik. Futbolçularımızı da bundan sonra daha artığına kökləməliyik. Çünki baş verən proseslər bunu deyir. Yenə deyirəm: Futbolçularım və komandam sağ olsun, həddindən artıq razıyam. Nəticəni kənara qoyaq, oyuna görə hamısını təbrik edirəm. İşimiz çoxdur. Yeni oyunçular gətirmişik. Bu oyun dramatik keçdi. Lakin əvvəlki matçlarda da favorit biz idik. Texniki məsələlər, bitiriciliklə bağlı problemimiz var, bunları da aradan qaldıracaq, qollar da vuracağıq. Daha da yaxşı olacağıq. Texniki məsələlər məşqlərlə düzələsi bir şeydirsə, söz verərdik ki, gələn oyun aradan qalxacaq. Bunun üzərində işləyirik".
Abasov "Zirə"nin ikinci qolu vurması ilə nəticələnən penalti epizodu barədə də danışıb: "Artıq şərhlərə də sığmır. Baş hakim Kamal Umudlu görünməyən VAR-dan penalti verdi yox, penalti çıxartdı. Bəli, referi çıxartdı. Görünən bu idi ki, bu gün qalib gəlməyimiz mümkünsüz bir şey idi. Maraqlısı odur ki, dördüncü hakimə (Elvin Bayramova - red.) dəfələrlə yalvardım. "Sənə qurban olum, uşaqları özüm sakitləşdirəcəyəm, qoldan əvvəl Alesio Kurçinin epizoduna da baxdır" dedim. O da söz verdi ki, narahat olma, baxdıracaq. Bildirdim ki, yanımda de. Cavab verdi ki, narahat olma, deyirəm. Amma sonradan baş hakim dedi ki, mənə deyən olmadı. Burada artıq hər şey məlumdur. Biz yaxşı "Neftçi" olacağıq. Bundan heç kimin şübhəsi olmasın. Zatən çoxlarında yaxşı "Neftçi" olma qorxusu var. Bunu da mən komandamla birlikdə aradan qaldıracağam".
