Azərbaycan Premyer Liqasında VII turun daha bir oyunu keçirilib.
Sportnet.az xəbər verir ki, Mehdi Hüseynzadə adına Sumqayıt şəhər stadionunda yerli komanda ilə "Turan Tovuz" üz-üzə gəlib.
Görüş qonaqların böyük hesablı qələbəsi ilə yekunlaşıb - 3:0.
Hesabı 35-ci dəqiqədə Joarlem Santos açıb. 59-cu dəqiqədə Aleks Souza fərqi artırıb.
72-ci dəqiqədə "Sumqayıt"ın futbolçusu Aleksandr Ramalinqom penaltini dəqiq yerinə yetirə bilməyib.
Əvəzində 90+3-cü dəqiqədə Ayxan Hüseynov matçda son nöqtəni qoyub.
Beləliklə, "Kəpəz"dən sonra "Sumqayıt"ı da 3:0 hesabı ilə darmadağın edən "Turan Tovuz" xalını 15-ə çatdıraraq, vahid lider olub. 11 xala malik "Sumqayıt" isə 5-cidir.
Xatırladaq ki, turun son oyunları oktyabrın 5-də keçiriləcək. "Karvan-Yevlax" "Sabah"ı, "Qəbələ" "Şamaxı"nı qəbul edəcək.
-------------------
Azərbaycan Premyer Liqasında VII turun növbəti görüşü keçirilib.
Sportnet.az xəbər verir ki, "Azersun Arena"da "Qarabağ" "Kəpəz"i qəbul edib.
Görüş meydan sahiblərinin minimal hesablı qələbəsi ilə yekunlaşıb - 1:0. Yeganə qolu 38-ci dəqiqədə Sami Mmae vurub. Bu, yayda transfer olunmuş mərakeşli müdafiəçinin yeni komandasında ilk qolu olub.
Beləliklə, "Qarabağ" 6 oyundan 13 xalla 2-ci pilləyə yüksəlib. Komandanın ehtiyatda ilk turdan təxirə salınmış "Sabah"la səfər oyunu da var. "Kəpəz" isə Azər Bağırovun rəhbərliyi altındakı ilk matçında da uduzaraq, ardıcıl 7-ci məğlubiyyət alıb. İndiyədək xal ala bilməyən yeganə komanda kimi Gəncə təmsilçisi turnir cədvəlində sonuncu pillədə qərarlaşıb.
------------------------
Bu gün Azərbaycan Premyer Liqasında VII turun növbəti oyunları keçiriləcək.
Sportnet.az xəbər verir ki, qarşılaşmalar Bakıda və Sumqayıtda təşkil olunacaq.
"Azersun Arena"da "Qarabağ" və "Kəpəz" komandaları üz-üzə gələcək. İlk 6 turdan sonra ehtiyatda bir oyunu olan Ağdam komandası 10 xalla 5-ci, bütün oyunlarını uduzan xalsız Gəncə təmsilçisi isə sonuncu yerdə gedir.
İndiyədək bu kollektivlər çempionatlarda 62 dəfə qarşılaşıblar. Bunların 35-də "Qarabağ", 14-də "Kəpəz" qalib gəlibsə, 12 görüş heç-heçə ilə yekunlaşıb. Topların nisbətində də ağdamlılar xeyli öndədir - 102:61. “Qarabağ” 36 oyundur "Kəpəz"ə uduzmur və 4 matçdır qol buraxmır. Ağdam klubu bu rəqibə son 3 ev görüşündə böyük hesabla qalib gəlib.
Bu oyun həm də Azər Bağırovun "Kəpəz"ə qayıdışından sonra ilk matçı kimi əlamətdar olacaq.
Günün digər matçında "Sumqayıt" Mehdi Hüseynzadə adına şəhər stadionunda "Turan Tovuz"u qəbul edəcək. Bu komandaların mübarizəsi daha böyük maraqla gözlənilir. Hazırda Tovuz komandası 12 xalla 3-cü, "gənclik şəhəri" təmsilçisi 11 xalla 4-cü yerdə gedir. İki kollektivin indiyəqədərki oyunlarında qələbə və heç-heçə sayı tam bərabər olubsa, topların nisbətində "Sumqayıt"ın minimal üstünlüyü var - 15:14. “Turan Tovuz” son 5 qarşılaşmada qol vurub. Axırıncı üç görüşdə meydan sahibi olan komanda xal qazanmayıb.
Azərbaycan Premyer Liqası, VII tur
4 oktyabr (şənbə)
17:00. “Qarabağ” – “Kəpəz” - 1:0
Qol: Sami Mmae, 38
Hakimlər: Nicat İsmayıllı, Rahil Ramazanov, Kərim Zeynalov, Vüqar Həsənli
VAR: Əli Əliyev
AVAR: Rəşad Əhmədov
Hakim-inspektor: Babək Quliyev
AFFA nümayəndəsi: Asif Əliyev
“Azersun Arena”
19:30. “Sumqayıt” – “Turan Tovuz” - 0:3
Qollar: Joarlem Santos, 35. Aleks Souza, 59. Ayxan Hüseynov, 90+3
Qolla nəticələnməyən penalti: Aleksandr Ramalinqom, 72 ("Sumqayıt")
Hakimlər: Fərid Hacıyev, Rəhman İmami, Şirmamed Mamedov, Əkbər Əhmədov
VAR: Rəvan Həmzəzadə
AVAR: Akif Əmirəli
Hakim-inspektor: Munis Abdullayev
AFFA nümayəndəsi: Seymur Səlimli
Mehdi Hüseynzadə adına Sumqayıt şəhər stadionu
Qeyd edək ki, turun ilk oyun günündə "Araz-Naxçıvan" "İmişli"ni yenib - 2:0. "Zirə" - "Neftçi" görüşündə isə qalib müəyyənləşməyib - 2:2.
