2026-cı il dünya çempionatının seçmə qrup mərhələsində oyun həftəsinin son qarşılaşmaları keçirilib.
Sportnet.az-ın məlumatına görə, 4 qrupda 8 görüş baş tutub.
E qrupundakı hər iki matçda meydan sahiblərinin böyük hesablı qələbələri qeydə alınıb. Türkiyə Gürcüstanla görüşdə 4:1 hesablı qələbə qazanıb. Hesabı 14-cü dəqiqədə Kenan Yıldız açıb. Merih Demiral 22-ci və 52-ci dəqiqələrdə fərqlənərək, dubl edib. 35-ci dəqiqədə isə Yunus Akgün fərqlənib. Gürcüstan millisinin təsəlli qolunu 64-cü dəqiqədə Giorgi Koçoraşvili vurub.
Qrupun digər oyununda İspaniya Bolqarıstanın qapısından 4 cavabsız top keçirib və ardıcıl 4-cü qələbəsini qazanıb. 35-ci və 57-ci dəqiqələrdə Mikel Merino fərqlənərək, dubl edib. Bolqarıstan millisinin futbolçusu Atanas Çernev 79-cu dəqiqədə öz qapısına göndərib. 90+2-ci dəqiqədə isə Mikel Oyarsabal penalti ilə son nöqtəni qoyub. İspaniya 4 oyundan 12 xalla liderdir, Türkiyə 9 xalla 2-ci, Gürcüstan 3 xalla 3-cüdür. Bolqarıstanın isə xalı yoxdur.
F qrupunda lider Portuqaliya Macarıstanla ev oyununda qələbəni və DÇ-2026-ya vaxtından əvvəl vəsiqə şansını əldən verib. 2:2 hesablı heç-heçə ilə yekunlaşmış qarşılaşmada Kriştianu Ronaldu 22-ci və 45+3-cü dəqiqələrdə fərqlənərək, dubl edib. Qonaq komandanın qollarını Attila Salai 8-ci, Dominik Soboslai 90+1-ci dəqiqədə vurub. Qrupun digər matçında İrlandiya yığması Evan Ferqyusonun qolu ilə Ermənistandan İrəvandakı məğlubiyyətin əvəzini çıxıb. Rəqib komanda 52-ci dəqiqədə Tiqran Barseqyanın qırmızı vərəqə alması üzündən oyunu azlıqda başa vurub.
I qrupunda 6 oyundan maksimal xalla lider olan Norveç bu tur dincəlib. Əvəzində İtaliya İsraili 3:0 hesabı ilə darmadağın edərək, fərqi 3-ə endirib. Qollardan ikisini Mateo Retegi 45+2-ci dəqiqədə penaltidən və 74-cü dəqiqədə vurub. Son nöqtəni 90+3-cü dəqiqədə Canluka Mançini qoyub.
Moldova ilk xalını Estoniya ilə səfər oyununda əldə edib. Komandanın qapısını bu dəfə "Araz-Naxçıvan"dan dəvət almış Kristian Avram yox, Andrey Kojuxar qoruyub. Meydan sahiblərindən Mattias Kyayt 12-ci, qonaqlardan Ştefan Bodişteanu 64-cü dəqiqədə qol vurub.
Nəhayət, K qrupunda İngiltərə səfərdə Latviyaya 5:0 hesabı ilə qalib gələrək, sona 2 oyun qalmış DÇ-2026-ya vəsiqəsini rəsmiləşdirib. Tomas Tuxelin baş məşqçi olduğu kollektivdən qollara Entoni Qordon 26-cı, Harri Keyn 44-cü və 45+4-cü, Ebereçi Eze 86-cı dəqiqələrdə imza atıb. Daha bir topu isə Latviya yığmasından Maksim Tonişev 58-ci dəqiqədə vurub. Beləliklə, 6 oyundan maksimum - 18 xal toplayan İngiltərə sona 2 tur qalmış ən yaxın izləyicisi - 11 xala malik Albaniya üçün əlçatmaz olub.
Qrupun digər görüşündə Serbiya Andorra ilə səfər oyununda qələbə qazanıb. Meydan sahiblərindən Giyom Lopes 17-ci dəqiqədə mərkəzdən dəqiq zərbə ilə hesabı açsa da, cəmi 2 dəqiqə sonra onun komanda yoldaşı Kristian Qarsia topu öz qapısına göndərib. Digər qolları Duşan Vlahoviç 54-cü, Aleksandar Mitroviç penaltidən 77-ci dəqiqədə vurub.
Serbiya yığmasını bu matça baş məşqçi qismində Zoran Mirkoviç çıxarıb.
DÇ-2026, seçmə mərhələ
14 oktyabr
E qrupu
22:45. İspaniya - Bolqarıstan - 4:0
22:45. Türkiyə - Gürcüstan - 4:1
Xal durumu: İspaniya - 12, Türkiyə - 9, Gürcüstan - 3, Bolqarıstan - 0
F qrupu
22:45. Portuqaliya - Macarıstan - 2:2
22:45. İrlandiya - Ermənistan - 1:0
Xal durumu: Portuqaliya - 10, Macarıstan - 5, İrlandiya - 4, Ermənistan - 3
I qrupu
20:00. Estoniya - Moldova - 1:1
22:45. İtaliya - İsrail - 3:0
Xal durumu: Norveç - 18 (6 oyuna), İtaliya - 15 (6), İsrail - 9 (7), Estoniya - 4 (7), Moldova - 1 (6)
K qrupu
22:45. Latviya - İngiltərə - 0:5
22:45. Andorra - Serbiya - 1:3
Xal durumu: İngiltərə - 18 (6 oyuna), Albaniya - 11 (6), Serbiya - 10 (6), Latviya - 5 (7), Andorra - 1 (7).
