Bu gün 2026-cı il dünya çempionatının Avropa zonası üzrə seçmə mərhələsində son görüşlər keçiriləcək.
Sportnet.az xəbər verir ki, axırıncı turun üçüncü oyun günündə 5 qrupda 10 matç təşkil olunacaq.
Qarşılaşmaların yekununda B, C, E, H, J qruplarının qalibləri birbaşa DÇ-2026-ya, ikinci yer sahibləri pley-offa vəsiqə qazanacaq.
B qrupunda Kosovo İsveçrənin mundiala vəsiqə şansını əlindən almaq üçün bu komandaya ən azı 6 top fərqi ilə qalib gəlməlidir.
C qrupunda birbaşa vəsiqənin taleyi Şotlandiya - Danimarka matçında həll olunacaq. Hazırda Danimarka 11 xalla lider olsa da, cəmi 1 xal geridə olan Şotlandiyanın ev oyununda qələbə şansı heç də az deyil.
E qrupunda 5 oyununun hamısını qələbə ilə başa vurmuş İspaniya Türkiyəni qəbul edəcək. "Ay-ulduzlular" meydan sahiblərini ən azı 7:0 hesabı ilə yenəcəkləri halda, mundiala çıxacaqlar. Əks halda, Vinçentso Montellanın baş məşqçi olduğu kollektiv pley-offda iştirak edəcək.
H qrupunda munndiala vəsiqə uğrunda görüşdə Avstriya ilə Bosniya və Herseqovina milliləri üz-üzə gələcək. Hazırda 16 xala malik qonaq komanda özündən 2 xal irəlidəki rəqibini keçmək üçün səfər matçında mütləq qələbə qazanmalıdır.
Nəhayət, J qrupunun 15 xala malik lideri Belçika xalsız Lixtenşteyni qəbul edəcək. Digər oyunda isə 13 xala malik iki komanda - Şimali Makedoniya ilə Uels qarşılaşacaq. "Qırmızı şeytanlar" "cırtdanlar"la görüşdə hətta heç-heçə etsələr belə, daha üstün top fərqinə görə mundiala vəsiqəyə daha yaxın olacaqlar. Makedoniyalılar isə bu halda britaniyalılara 7 top fərqi ilə qalib gəlməlidirlər. Uels isə yalnız qələbə təqdirində, ən azı pley-offa yüksələcək.
DÇ-2026
Seçmə mərhələ
18 noyabr
B qrupu
23:45. İsveç - Sloveniya
23:45. Kosovo - İsveçrə
Xal durumu: İsveçrə - 13, Kosovo - 10, Sloveniya - 3, İsveç - 1
C qrupu
23:45. Şotlandiya - Danimarka
23:45. Belarus - Yunanıstan
Xal durumu: Danimarka - 11, Şotlandiya - 10, Yunanıstan - 6, Belarus - 1
E qrupu
23:45. İspaniya - Türkiyə
23:45. Bolqarıstan - Gürcüstan
Xal durumu: İspaniya - 15, Türkiyə - 12, Gürcüstan - 3, Bolqarıstan - 0
H qrupu
23:45. Avstriya - Bosniya və Herseqovina
23:45. Rumıniya - San Marino
Xal durumu: Avstriya - 18 xal (7 oyuna), Bosniya və Herseqovina - 16 (7), Rumıniya - 10 (7), Kipr - 8 (8), San Marino - 0 (7)
J qrupu
23:45. Uels - Şimali Makedoniya
23:45. Belçika - Lixtenşteyn
Xal durumu: Belçika - 15 xal (7 oyuna), Şimali Makedoniya - 13 (7), Uels - 13 (7), Qazaxıstan - 8 (8), Lixtenşteyn - 0 (7)
Daha əvvəl Fransa, İngiltərə, Xorvatiya, Norveç, Portuqaliya, Almaniya və Niderland yığmaları da gələn il ABŞ, Meksika və Kanadada keçiriləcək dünya çempionatına vəsiqə qazanıb. Ukrayna, Albaniya, Çexiya, İtaliya, İrlandiya, Slovakiya və Polşa isə pley-offa çıxıb.
