"Qələbəyə görə sevinirəm. Xarakter göstərdik. Bəzi itkilərimiz var idi. Xüsusilə də, Rayan Senhaci oynamırdı. "Şamaxı" hesabı açdı. Onlara qarşı oynamaq çətindir. Amma biz bunu bacardıq, xarakter göstərdik, qalib gəldik. Oyunçularımı təbrik edirəm".
Sportnet.az xəbər verir ki, bu sözləri "Sumqayıt"ın məşqçisi Veliçko Kaplanoviç səfərdə "Şamaxı"ya 2:1 hesabı ilə qalib gəldikləri Azərbaycan Premyer Liqasının XIII tur oyunundan sonra keçirilmiş mətbuat konfransında deyib.
"Şamaxı" - "Sumqayıt" görüşünün sonlarında Saşa İliç qırmızı vərəqə aldığı üçün konfransa onun köməkçisi qatılıb. Kaplanoviç komandanın aparıcı futbolçusu Höccət Haqverdinin oynamamasının səbəbini də açıqlayıb: "Xırda zədəsi var idi. Meydançanın süni olduğu da nəzərə alsaq, riskə getmədik".
O, həmçinin Ayxan Abbasovla Saşa İliç arasında yaşanmış münaqişəyə də toxunub: "İnanın ki, heç nə bilmirəm. Çünki həmin anda oyuna baxırdım və futbolçularımızdan biri ilə danışırdım. Epizodun hansı səbəbdən baş verdiyini dəqiq görmədim".
