"Həqiqətən də oyun bizim üçün çətin oldu. Bir müddətdir ki, yaxşı oynayıb qələbə qazanmamaq qorxusu yaranıb. Eyni zamanda, azarkeşlər qarşısında oynayırdıq". Sportnet.az-ın məlumatına görə, bunu "Kəpəz"in baş məşqçisi Şahin Diniyev "Sumqayıt"ı 3:1 hesabı ilə yendikləri Azərbaycan Premyer Liqasının VII tur matçından sonra deyib.
49 yaşlı mütəxəssisin fikrincə, ilk qoldan sonra komandası daha yaxşı futbol sərgiləyib: "Hücumda etdiyimiz dəyişikliklər matçı rəngarəngləşdirdi. Ebah oyuna daxil olduqdan sonra ona iki müdafiəçi təhkim olundu. Elə olan halda, yarımmüdafiəçilər üçün geniş sahə yarandı. Hazırda mənim əlimdə 3 hücumçu var ki, onlar hər bir an istənilən oyunun taleyini həll edə bilərlər. Juninyonun formasını bərpa etməsi də sevindirici məqamdır".
3 xala layiq futbol sərgilədiklərini deyən Diniyev nəticənin ədalətli olduğu qənaətinə gəlib: "Qələbədə hər bir oyunçunun payı var. İki qol vuran Juninyo isə digərlərini faiz nisbəti ilə üstələyir".
