Avstriyada təlim-məşq toplanışını davam etdirən "Qarabağ"ın növbəti yoxlama görüşünün başlama vaxtı açıqlanıb. Sportnet.az-ın klubun rəsmi saytına istinadən verdiyi məlumata görə, "Viktoriya" ilə keçiriləcək qarşılaşma iyulun 4-ü Bakı vaxtı ilə saat 20:00-da başlayacaq.
Ağdam klubunun sonuncu rəqibi isə Almaniyanın "Zonnenhof" klubu olacaq. Almaniya Regional Liqasında mübarizə aparan komandayla görüş isə iyulun 8-i Bakı vaxtı ilə saat 21:00-da start götürəcək.
Qeyd edək ki, Qurban Qurbanovun başçılıq etdiyi komanda artıq Avstriyada 3 yoxlama görüşü keçirib. Ukrayna "Şaxtyor"una 0:2 hesabı ilə məğlub olan "köhlən atlar" "Krasnodar"la da görüşdən meydanı başı aşağı tərk edib - 0:1. "Qarabağ" sonuncu görüşünü "Vakker Burqhauzen"ə qarşı keçirib və 2:0 hesablı qələbə qazanıb.
