"Qəbələ"nin müdafiəçisi Arif Daşdəmirovun Sportnet.az-a müsahibəsi
- "İnter"lə oyunda "Qəbələ" qələbə həsrətinə son qoydu. 1:0 hesablı qələbəni necə şərh edərdin?
- Çətin oyun alındı. "İnter" yaxşı formadadır. Hava şəraiti də oyunumuza təsir göstərdi. Deyərdim ki, bərabər səviyyəli oyun keçdi. Əvvəldən də düşünürdüm ki, hesabı açan tərəf qələbə qazanacaq. Bunu da biz bacardıq. Qalib gəlməliydik. Şadam ki, sonda 3 xal qazana bildik.
- Nəticə aydındır. Bəs "Qəbələ"nin oyunu səni qane etdi?
- Normal oyun göstərdik. Əvvəlki qarşılaşmayla müqayisədə oyunumuz bu dəfə daha yaxşı alındı. Hava şəraiti də çətin idi. Hiss olunur ki, komanda yavaş-yavaş özünə gəlir. Amma bundan sonra daha çox çalışmalıyıq.
- Matçdan öncə komandada psixoloji durum necə idi? Çünki son yenilgidən sonra xeyli tənqid olunmuşdunuz...
- Tənqidlər var idi. Amma son günlər toparlandıq. Öz aramızda söhbətlər də apardıq. Bilirdik ki, mütləq qalib gəlməliyik. Hamı bunu başa düşürdü. Hər kəs bütün gücünü meydanda qoydu, qələbə üçün əlindən gələni etdi.
- Adətən "qara zolaq"dan çıxmaq üçün 1 qələbəyə ehtiyac duyulur. "Qəbələ"nin bu qələbədən sonra özünə gələcəyini söyləmək olar?
- Bunu indidən demək çətindir. Hər şey Allahın əlindədir. Biz işimizi düzgün qursaq, nəticə də gələcək.
- Növbəti turda "Sumqayıt"la qarşılaşacaqsınız...
- "Sumqayıt" yaxşı komandadır. Qış fasiləsində də heyətlərini gücləndiriblər. Oyun asan keçməyəcək. Hər iki tərəf qalib gəlmək istəyəcək. Aydın məsələdir ki, 3 xalı qazanmaq üçün çalışacağıq. Ev oyununda mütləq qalib gəlməliyik.
- Artıq "Qəbələ" turnir cədvəlində dördüncü pilləyə yüksəlib. Mövsümün sonunda hansı pilləyə sahib çıxmağa ümid edirsiniz?
- Məqsədimiz çempionluqdur. Bunun üçün hər oyunda qalib gəlməliyik. Sona qədər mübarizəmizi davam etdirəcəyik.
- Yəni, çempionluq hədəfi qüvvədə qalır?
- Təbii ki. "Qəbələ"nin məqsədi mövsümün sonunda çempion olmaqdır. Bunun üçün əlimizdən gələni edəcəyik.
- "İnter"lə oyunda qapıda Dmitri Bezotosnı dayanmışdı. Düşünmək olar ki, məhz onun start heyətində olması komanda üçün daha faydalıdır?
- Komandada bütün oyunçular eynidir. Məşqçi kimin oynayacağına qərar verir. Son yenilgiyə görə təkcə Popoviçi günahlandırmaq olmaz. Biz "Kəpəz"ə komanda olaraq uduzduq.
