"Son turlarda qalib gələ bilmədiyimizdən, bu qələbə bizim üçün çox vacib idi. 3 xal qazanmaq vəzifəsinin öhdəsindən gəldik". Sportnet.az-ın məlumatına görə, bunu "Qəbələ"nin futbolçusu Ermin Zets "İnter"i 1:0 hesabı ilə yendikləri Azərbaycan Premyer Liqasının XX tur matçından sonra deyib.
Qələbə topunun müəllifi olan bosniya və herseqovinalı hücumçu görüş haqda fikirlərini gabalafc.az-a açıqlayıb: "İnter” çox yaxşı komandadır. Onlara qarşı oynamaq həmişə çətindir. Bu matç da ağır oyun oldu. Amma yaranan qol imkanından istifadə edib, qalib gələ bildik. Komanda şəklində mübarizə aparıb, öz oyunumuzu nümayiş etdirdik".
Zets qarşıdakı görüşlərdə də sonadək mübarizə aparacaqlarını vurğulayıb. Onun fikrincə, bu qələbə "Qəbələ" üçün yeni uğurların başlanğıcı olacaq: "Düşünürəm ki, "İnter”i məğlub etməklə qələbə seriyasına başladıq. Bunun davamını gətirmək üçün əlimdən gələni etməyə, hər matçda qol vurmağa çalışacağam. Təbii ki, əsas 3 xal qazanmağımızdır. Qələbə qolunu vurduğum üçün sevinirəm. Lakin daha vacib olan qələbəmiz idi".
Qol epizoduna gəlincə, hücumçu bildirib ki, həmin vaxt topun tirdən dönüb, ona düşəcəyini gözləməyib. Amma top ayağına düşəndən sonra yalnız ona dəqiq zərbə vurmaq haqda fikirləşib.
