"Bizi olduqca çətin görüşün gözlədiyini dərk edirik. Çünki "İnter" ilə bir xal fərqimiz var. Turnir cədvəlində qonşu pillələrdə yer almışıq". Sportnet.az-ın məlumatına görə, bunu "Kəpəz"in futbolçusu Kərim Diniyev klub rəsmi saytına açıqlamasında deyib.
Azərbaycan Premyer Liqasının XXII turunda "İnter"lə səfərdə keçiriləcək oyun haqda danışan yarımmüdafiəçi hədəflərinin qələbə olduğunu bildirib: "Qarşıdakı oyun 6 xallıq əhəmiyyət daşıyır. Qalib gələn tərəf üç xal qazanmaqla yanaşı, rəqibindən bir qədər aralanaraq üstünlük əldə edəcək. Bunu yaxşı anlayırıq. Ona görə bizim üçün vacib görüş olacaq. Ciddi hazırlaşmışıq, hədəfimiz qələbədir".
23 yaşlı futbolçu komandasının sonuncu turda "Qarabağ"a məğlub olmasından da danışıb. O, şanssız şəkildə uduzmaqlarının düşərgədə ruh düşkünlüyünə səbəb olmadığını, əksinə futbolçulara əlavə motivasiya verdiyini söyləyib: "Buraxdığımız sonuncu qol kuryoz alındı. Bu məğlubiyyət bizi ruhdan salmayıb, əhval-ruhiyyəmiz yerindədir. Hər şey plan üzrə gedir. Uduzmağımız bizi "İnter" ilə matçda daha diqqətli oynamağa məcbur edir. Başa düşürük ki, evdəki məğlubiyyəti səfərdə uğurlu nəticə qazanmaqla sığortalaya bilərik. Bunun üçün bütün gücümüzü meydanda qoyacağıq. Başqa yolumuz yoxdur".
