"Kəpəz” Premyer Liqanın XXII turunda Bakıda qarşılaşacağı "İnter” ilə oyunun hazırlıqlarını tamamlayıb. Sportnet.az-ın məlumatına görə, "sarı-göylər” qarşıdakı matçın son məşqinə oyunun keçiriləcəyi "İnter Arena”da çıxıb.
Uzun müddətə sıradan çıxan Dario Frederikonu nəzərə almasaq komandanın heyətində itgi yoxdur. Digər zədəlilərin olmaması və ötən tur cəzalı olan Budaq Nəsirovun sıraya dönməsi məşqçilər korpusunu sevindirir.
"İnter” ilə matç öncəsi Gəncə klubunun baş məşqçisi Şahin Diniyev kapazpfc.az saytına açıqlama verib: "Bizi 6 xallıq oyun gözləyir. Rəqiblə turnir cədvəlində qonşuyuq. Liderlər qrupundan aralı düşməmək üçün hər iki komandaya uğur qazanmaq lazımdır. Ona görə matç həm bizim, həm də onlar üçün vacibdir. Bakı təmsilçisi uğura ac olan komandadır. Son oyunlarda yaxşı oynayıb qələbə qazana bilməyiblər. Bu səbəbdən "Kəpəz” ilə görüşdə qələbə qazanmağa və bu yolda bizə böyük problemlər yaratmağa çalışacaqlar. Deyərdim ki, şanslar bərabərdir”.
Qeyd edək ki, bu gün "İnter Arena"da keçiriləcək matç saat 15:00-da başlanacaq.
