Futbol üzrə Çempionlar Liqasında 1/8 final mərhələsinin daha iki oyunu keçirilib. Sportnet.az-ın məlumatına görə, İngiltərə və İtaliyada baş tutmuş qarşılaşmaların nəticələri qonaqlar üçün daha sərfəli olub.
Londonda "Arsenal" İspaniyanın "Barselona" klubunu qəbul edib. Kataloniyalıların heyətində top qovan Arda Turan bu gecə meydana çıxa bilməyib. Səbəb türkiyəli yarımmüdafiəçinin ötən mövsüm "Atletiko"nun heyətində çıxış edərkən, "Real Madrid"lə Çempionlar Liqasının yarımfinal mərhələsinin cavab görüşündə qırmızı vərəqə alması olub. Amma digər türk Cüneyt Çakır matçın baş hakimi kimi meydanda olub. Görüşün taleyini isə Lionel Messinin "dubl"u həll edib. Oyunun sonlarında argentinalı hücumçu əvvəlcə kombinasiyalı hücumu, daha sonra penaltini dəqiq zərbə ilə tamamlayıb.
Gecənin digər görüşündə isə İtaliya "Yuventus"u ilə Almaniya "Bavariya"sı üz-üzə gəlib. Qonaqlar ikinci hissənin əvvəllərində 2 top fərqi ilə öndə olsalar da, meydan sahibləri məğlubiyyətdən qurtulmağı bacarıb. Bununla belə, "Bavariya" cavab görüşünə üstün durumda çıxma haqqı əldə edib.
Çempionlar Liqası, 1/8 final
23:45. "Arsenal" (İngiltərə) - "Barselona" (İspaniya) - 0:2
Qol: Lionel Messi, 71; 83-penalti ilə
Baş hakim: Cüneyt Çakır (Türkiyə)
London. "Emirates" stadionu
23:45. "Yuventus" (İtaliya) - "Bavariya" (Almaniya) - 2:2
Qollar: Paulo Dibala, 63. Stefano Sturaro, 76 - Tomas Müller, 43. Aryen Robben, 55
Baş hakim: Martin Atkinson (İngiltərə)
Turin. "Yuventus" stadionu
Qeyd edək ki, 1/8 final mərhələsinin ötən həftə keçirilmiş ilk 4 oyununda Fransa PSJ-si İngiltərənin "Çelsi" klubunu 2:1, Portuqaliya "Benfika"sı Rusiya "Zenit"ini 1:0 hesabı ilə yenib, İtaliya "Roma"sı İspaniya "Real Madrid"inə 0:2, Belçika "Gent"i Almaniya "Volfsburq"una 2:3 hesabı ilə uduzub. İlk görüşlərə fevralın 24-də "Dinamo" (Kiyev, Ukrayna) - "Mançester Siti" və PSV (Hollandiya) - "Atletiko" (Madrid, İspaniya) matçları ilə yekun vurulacaq.
