AZAL klubu "Neftçi" ilə Azərbaycan Premyer Liqasının XXV tur matçında daha bir bəxtsizliklə üzləşib. Sportnet.az-ın məlumatına görə, 40-cı dəqiqədə Kamal Mirzəyev qol vurarkən zədələnib.
Onun baş zərbəsi zamanı "Neftçi"nin müdafiəçilərindən birinin təpiyi onun sifətinə tuş gəlib. Nəticədə gənc yarımmüdafiəçinin gözünün altı partlayıb. Mirzəyevə əvvəlcə meydanda tibbi yardım göstərilib, sonra isə o, xərəklə ehtiyat oyunçular skamyasının yanına aparılıb. Oyuna davam edə bilməyən futbolçunu Adan Koronado əvəzləyib.
Qeyd edək ki, bu, AZAL-ın ilk yarıda ikinci məcburi əvəzləməsi olub. İlk dəyişiklik 26-cı dəqiqədə baş verib. Tagim Novruzov zədələndiyi üçün yerini Hacı Əhmədova verib. İlk yarıdan sonra "təyyarəçilər" öndədir - 1:0.
