Azərbaycan Premyer Liqasının XXVI turunda üz-üzə gələcək "Xəzər Lənkəran" və "İnter" komandaları meydana itkilərlə çıxacaq. "Sportnet.az-ın məlumatına görə, meydan sahiblərinin 2 futbolçusu bu tur forma geyinməyəcək.
Komandanın qapıçısı Orxan Sadıqlı ötən tur "Kəpəz"lə oyunda sarı vərəqə limitini doldurub. Bu səbəbdən 23 yaşlı əlcək sahibi "İnter"lə oyunu buraxmalı olacaq. Bundan başqa Tural Qürbətov da "İnter"lə oyunda meydana çıxmayacaq. Səbəb isə futbolçunun müqavilə ilə "bankirlər"ə məxsus olmasıdır. Onun bu tur top qovması üçün "Xəzər Lənkəran" tərəfi kluba müraciət etməlidir. Razılıq olarsa, Qürbətov "İnter"ə qarşı çıxış edə bilər. Lakin cənubluların mətbuat xidmətinin rəhbəri Hüseyn Cəbrayıloğlu hələ ki, qarşı tərəfə heç bir müraciətin olmadığını bildirib.
Paytaxt təmsilçisi isə səfər görüşünə daha çox itki ilə yollanır. "Bankirlər"in baş məşqçisi Zaur Svanadze zədəli Qara Qarayev, Nizami Hacıyev, Fuad Bayramov, Rauf Əliyev və Laşa Salukvadzenin xidmətindən məhrum olub.
Qeyd edək ki, martın 20-də keçiriləcək oyun saat 13:30-da başlayacaq.
