Bu gün futbol üzrə Azərbaycan Premyer Liqasında XXXV turun oyunları keçirilib. Sportnet.az-ın məlumatına görə, turun bütün görüşləri eyni saatda start götürüb.
"Zirə" doğma meydanda Gəncənin "Kəpəz" klubunu qəbul edib. Qarşılaşma 2:2 hesabı ilə başa çatıb. Bununla da "Zirə" cari mövsümün gümüş medalını təmin edib. "Kəpəz" isə xal ehtiyatını 56-ya çatdıraraq "İnter"lə 3 və 4-cü pilləni bölüşür.
Turnir cədvəlinin vahid lideri "Qarabağ" autsayder "Rəvan"ın qonağı olub. "Bayıl Arena"da gözlənilməz nəticə qeydə alınıb. "Rəvan" lideri məğlub edib - 2:1. Bəhmən Həsənovun rəhbərlik etdiyi komanda xallarını 17 çatdırıb.
Paytaxt derbisində "Neftçi" və "İnter" komandaları üz-üzə gəlib. Oyunda hesabı "bankirlər" açsa da qələbəni əldən veriblər. "Neftçi" bu görüşdən 4:2 hesablı qələbə ilə ayrılıb. Nəticədə "İnter" mövqeyini itirərək "Qəbələ" və "Kəpəz"lə 3, 4 və 5-ci pillələri bölüşür. "Neftçi" isə 49 xalla 6-cı pilləyə qalxıb.
Cari mövsüm istədiyi nəticəni qazana bilməyən "Xəzər Lənkəran" "Sumqayıt"ı qonaq edib. Oyun qonaqların 1:2 hesablı qələbəsi ilə yekunlaşıb. "Ağ-yaşıllar" bu məğlubiyyət sayəsində turnir cədvəlinin sonuncu pilləsinə enib.
"Qəbələ" isə AZAL-ı sınağa çəkib. Avrokuboklara vəsiqə qazanmış Roman Qriqorçukun rəhbərlik etdiyi komanda 2:0 hesablı qələbəni bayram edib və xallarını 56-ya yüksəldib. "Qəbələ" Bakının "İnter" klubu və "Kəpəz"lə 3, 4 və 5-ci pillələri bölüşür.
Qeyd edək ki, Azərbaycan Premyer Liqasının 2015/2016 mövsümünə mayın 21-də keçiriləcək 36-cı turun oyunları ilə yekun vurulacaq.
15 may (bazar)
"Rəvan” – "Qarabağ” - 2:1
Qollar: Ramazan Abbasov, 26 (P). Elnur Abdulov, 55 - Əfran İsmayılov, 45+1 (P)
Qırmızı vərəqə: Eltun Yaqublu, 25 (birbaşa)
Hakimlər: Elvin Əsgərov, Munis Abdullayev, Coşqun Həsənov, Orxan Məmmədov
AFFA nümayəndəsi: Eldar Qasımov
Hakim-inspektor: Əli Hüseynov
"Bayıl Arena”
"Xəzər Lənkəran” – "Sumqayıt” - 1:2
Qollar: Tural Qürbətov, 34-pen - Vaqif Cavadov, 65, Amil Yunanov
Hakimlər: İnqilab Məmmədov, Vüqar Bayramov, Vüsal Qənbərov, Nail Nağıyev
AFFA nümayəndəsi: Rauf Hüseynli
Hakim-inspektor: Gülağa Cabarov
"Xəzər Lənkəran” mərkəzi stadionu
"Neftçi” – "İnter” - 4:2
Qollar: Ruslan Qurbanov, 27. Araz Abdullayev, 33. Elşən Abdullayev, 52, Aylton Silva, 84 - Mirsahib Abbasov, 7, 90+2
Hakimlər: Ramil Diniyev, Mehman Mahmudov, Akif Əmirəli, Rəhim Həsənov
AFFA nümayəndəsi: Ramiz Mustafayev
Hakim-inspektor: Məlik Həsənov
"Əlincə Arena”
"Zirə” – "Kəpəz” - 2:2
Qol: Elvin Məmmədov, 68. Nicat Qurbanov, 90+1 - Orxan Əliyev, 26. Bəxtiyar Soltanov, 75
Hakimlər: Rauf Cabbarov, Zeynal Zeynalov, Nahid Əliyev, Rövşən Rəcəbov
AFFA nümayəndəsi: Arif Fərəcov
Hakim-inspektor: Murad Məmmədov
Zirə İdman Kompleksinin stadionu (CBC Sport, canlı)
"Qəbələ” – AZAL - 2:0
Qol: Asif Məmmədov, 20. Aleksey Qay, 86
Hakimlər: Rəvan Həmzəzadə, Yaşar Abbasov, Rahil Ramazanov, Mahir Məmmədov
AFFA nümayəndəsi: Maşallah Əhmədov
Hakim-inspektor: Vüsal Əliyev
Qəbələ şəhər stadionu
Qeyd: Turun bütün görüşləri saat 18:00-da başlanacaq.
