"Qarabağ"ın futbolçusu Ansi Aqolli Albaniya milli komandasının heyətində Avro-2016-ya hazırlığını davam etdirir. Sportnet.az-ın məlumatına görə, albanlar bu dəfə final mərhələsinin digər iştirakçısı - Ukrayna yığması ilə yoldaşlıq görüşü keçirib. İtaliyanın Berqamo şəhərində keçirilən matç ukraynalıların 3:1 hesablı qələbəsi ilə nəticələnib.
Klubunda olduğu kimi, yığmada da müdafiənin sol cinahında çıxış edən Aqolli 90 dəqiqə meydanda olub. Oyunda hesabı 8-ci dəqiqədə ukraynalılardan Taras Stepanenko açıb. Bundan 5 dəqiqə sonra Armando Sadiku hesabı bərabərləşdirib. Ukrayna yığması sonrakı 2 qoluna fasilədən sonra - 49-cu dəqiqədə Andrey Yarmolenko və 87-ci dəqiqədə Oleq Konoplyanka ilə imza atıblar.
