Şimali İrlandiya yığmasının futbolçusu Kayl Laffertinin şərəfinə Belfast aeroportunun adı verilib. Sportnet.az-ın məlumatına görə, müvəqqəti qərar ölkə millisinin bu gün Polşa ilə keçirəcəyi AVRO-2016-nın oyunu ilə əlaqədar verilib.
Əslində isə hava limanı əfsanəvi şimali irlandiyalı hücumçu Corc Bestin adını daşıyır. Ad dəyişikliyi təsadüfi edilməyib. Lafferti AVRO-2016-nın seçmə qrup mərhələsində 7 qol vurub ki, bu da ölkə yığması tarixində ən yüksək göstəricidir. Hazırda icarə əsasında İngiltərənin "Birmingem Siti" klubunda çıxış edən 28 yaşlı forvard müqavilə üzrə "Norviç Siti"yə məxsusdur.
Qeyd edək ki, Şimali İrlandiya millisi Avropa çempionatının debütantıdır. Bu komanda DÇ-2018-in seçmə qrup mərhələsində Azərbaycan yığmasının rəqiblərindəndir.
