"İlk oyunda hər iki komanda bir-birinə elə də bələd deyildi. Maltada bəxt "Qarabağ”ın tərəfində oldu və minimal hesablı qələbə qazandılar”. Bu sözləri Sportnet.az-a "Valletta”nın futbolçusu Şaun Bajada deyib.
Çempionlar Liqasının II təsnifat mərhələsinın cavab oyunları çərçivəsində keçirilən "Qarabağ” – "Valletta” oyununda sarı vərəqə ilə cəzalanan futbolçu meydançada hakimə qəzəblənsə də, oyun sonrasında mətbuata bu haqda danışmaq istəmədi: "Cavab oyununda düşünürdük ki, artıq rəqibə bələdik və istədiyimiz hesabı əldə edə bilərik. Lakin əksi oldu. Rəqib bizi daha yaxşı təhlil etdi. Qırmızı vərəqələr də oyuna öz təsirini göstərdi. Lakin hakimlik haqda danışmaq istəmirəm. Hər şeyi özünüz gördünüz”.
