"Neftçi"nin baş məşqçisi Vəli Qasımov Maltada "Baltsan" üzərində 2:0 hesablı qələbə qazandıqları Avropa Liqasının I təsnifat mərhələsinin ilk görüşü barədə danışıb. 48 yaşlı mütəxəssis Sportnet.az-a müsahibəsində növbəti mərhələ istəyinə böyük ölçüdə nail olduqlarını bildirib.
Qasımov oyunu belə dəyərləndirib: "Rəqibin heyətində meydana çox təcrübəli oyunçular çıxmışdı. İlk yarıda biz topu daha yaxşı saxlayır, qol vəziyyətləri yaradırdıq. Buna baxmayaraq, bir qol vurduq. İkinci hissədə isə bir qədər çətinlik çəkdik. Rəqib komanda uzun ötürmələrlə bizim üzərimizə təzyiqləri artırdı, qol vəziyyətləri yaratdı. Lakin futbolçularımız topu özlərində yaxşı saxlayaraq, əks-hücumlarla bir neçə şans yaxaladı. Bunlardan yararlana bilməsək də, sonda istəyimizə penalti ilə nail olduq. Artıq demək olar ki, növbəti mərhələ istəyimizə nail olmuşuq".
Qeyd edək ki, cavab görüşü iyulun 7-də "Bakcell Arena"da keçiriləcək.
