"Özümü çox xoşbəxt hiss edirəm. 5:1 hesablı qələbə qazandıq. Bunu həm özüm, həm də komandam adına çox yaxşı nailiyyət hesab edirəm". Sportnet.az-ın məlumatına görə, bunu "Qəbələ"nin futbolçusu Teo Uiks Gürcüstan "Samtredia"sını 5:1 hesabı ilə yendikləri Avropa Liqasının I təsnifat mərhələsinin ilk oyunundan sonra CBC Sport-a açıqlamasında deyib.
O, az müddət öncə gəlməsinə baxmayaraq, komandaya tez uyğunlaşması və 3 qol vurmasına da aydınlıq gətirib: "Peşəkar futbolçu harda olmasından asılı olmayaraq, komandaya uyğunlaşmalıdır. Mən də bura yeni gəlmişəm. Buna baxmayaraq, baş məşqçinin dediklərini, tələblərini yerinə yetirirəm. Komandaya qısa müddətdə adaptasiya olunmağa çalışdım. Bu, qismən də olsa, alındı".
