Azərbaycan Premyer Liqasının yeni mövsümün startı AZAL üçün uğursuz alınıb. Sportnet.az-ın məlumatına görə, "təyyarəçilər” 16 aydan sonra Şüvəlandakı stadionunda uduzub. Bu, ilk turda "Neftçi”yə 0:2 hesablı məğlubiyyət olub.
Tərlan Əhmədovun komandası ötən mövsüm "AZAL Arena”da məğlubedilməz olmuşdu. Düzdür, həmin çempionatın əvvəlində "Qarabağ”, "Qəbələ” və "İnter”ə ev məğlubiyyətləri olsa da, bu, Mərdəkanda "Dalğa Arena”da qeydə alınmışdı. Çinki onda Şüvəlandakı arenada təmir işləri getdiyindən, AZAL rəqiblərini qonşu qəsəbə stadionunda qəbul edirdi.
AZAL-ın bunadək öz meydançasında son məğlubiyyəti 2015-ci aprelin 5-də "Qəbələ”yə olmuşdu. Həmi 0:4 hesablı darmadağından sonra "təyyarəçilər” "AZAL Arena”da heç kimə uduzmurdu. Bu uğurlu seriya 489 gün çəkdi. Özü də "Neftçi” keçmiş qapıçısı, "təyyarəçilər”də rəsmi debütü olan Aqil Məmmədova vurduğu qollarla qələbə qazandı.
