"Səfərdəki oyunlarımız çətin olu. Bu da ən məsuliyyətli səfərlərimizdəndir". Bunu Sportnet.az-a açıqlamasında "Qarabağ"ın futbolçusu Qara Qarayev deyib.
Avropa Liqasının pley-off mərhələsində İsveçin "Göteborq" komandası ilə mübarizə aparacaq "köhlən atlar"ın yarımmüdafiəçisi sərfəli nəticə ilə qayıdacaqlarına ümid etdiklərini bildirib: "Ümid edirəm ki, qrup mərhələsində oynayacağıq. İlk oyunda sərfəli nəticə ilə dönməliyik. Çoxları düşünür ki, "Göteborq" zəif rəqibdir, amma elə deyil. Bunun heç bir önəmi yoxdur. Turu keçmək üçün səfərdə qol vurmaq lazımdır. Bu bizim üstünlüyümüzdür".
Q.Qarayev "Qəbələ" haqda da fikirlərini söyləyib: "Qəbələ" də Sloveniyanın "Maribor" klubu ilə qarşılaşacaq. Onlarla bizim rəqibləri müqayisə etməzdim. Hansısa komandanın zəif rəqiblə oynayacağını demək, onlara qarşı hörmətsizlikdir. Həm "Qəbələ", həm də "Qarabağ" hörmət ediləsi komandalardır. Bizə düşən komandalar da zəif deyil. İnanıram ki, "Qəbələ" də, biz də mərhələ keçib, qrupda oynayacağıq".
Qeyd edək ki, "Qarabağ" bu gün saat 18:00-da İsveçə yola düşür. Matç avqustun 18-də Bakı vaxtı ilə saat 21:00-da başlayacaq.
