Topaz Premyer Liqasının I turu "Xəzər Lənkəran”da bir yubileylə əlamətdar olub. Sportnet.az-ın klubun rəsmi saytına istinadən məlumatına görə, "ağ-yaşıllar” Azərbaycan çempionatları tarixində 90-cı dəfə meydanı heç-heçə ilə tərk edib.
AZAL-la səfər qarşılaşmasınadək Premyer Liqada 301 oyun keçirən cənub təmsilçisi 89 bərabərliklə kifayətlənmişdi. "AZAL Arena”dakı görüşdə qeydə alınan 1:1 hesabı bu siyahıda 90-cı olub.
2004-cü ildə tarixinin ilk oyununda səfərdə "Turan”la eyni hesablı heç-heçə ilə tarixinə start verən "Xəzər Lənkəran” 90-a 10 ildə çatıb. Bununla da "ağ-yaşıllar" həm də start ənənəsinə davam edib. Bu komanda ardıcıl 3-cü dəfə mövsümə 1:1 hesabı ilə başlayıb. 2012/2013 mövsümündə "Rəvan”, 2013/2014 mövsümündə "Sumqayıt”la qarşılaşan cənublular ardıcıl 3-cü dəfə ilk görüşdə 1 qol vurub və 1 xalla kifayətlənmişdi. Ardıcıl 3-cü dəfə "Xəzər Lənkəran” ilk turu rəqib meydanında keçirib və yenə 1:1 hesabı qeydə alınıb. Amma əvvəlki iki startdan fərqli, bu dəfə "Xəzər Lənkəran” hesabda geri düşməyib, ilk qolu vuran tərəf olub.
Qeyd edək ki, çempionatdakı 90 heç-heçədən 39-u 0:0, 35-i 1:1, 16-sı 2:2 hesabı ilə başa çatıb.
