"İnter"in seleksiyaçı məşqçisi Zaur İsmayılovun Sportnet.az-a müsahibəsi
- FİFA-nın qərarı ilə "İnter"ə qarşıdakı iki "transfer pəncərəsi"ndə futbolçu almağa qadağa qoyulub. Ona görə də qış fasiləsində oyunçu ala bilməyəcəyiniz dəqiqdir. Bəs hazırlıqla bağlı digər planlarda məlum olanlar varmı?
- Tranferlə bağlı bir şeyi deyim ki, ola bilsin indi və yay fasiləsində FİFA-ya məsələyə yenidən baxılması haqda müraciət olunsun. Bəlkə bu cəzanı "İnter"ə keçdilər. Çünki legionerlərə olan borclar demək olar bağlanıb, məsələ həll olunub. Bu haqda klubda fikirləşirlər ki, FİFA-ya müraciət olunsun. Ola bilər ki, qərar ləğv olunsun və futbolçu transfer etməyimizə icazə verilsin.
- Borcların artıq bağlandığı dəqiqdirmi?
- Mən bildiyimə görə, yalnız bir legionerin məsələsi qalmışdı.
- Kimin?
- Fransalı müdafiəçi Yohan Bokonyanonun məsələsi qalmışdı. O da həll olunmalı idi. "İnter"in neçə legionerə borcu vardı, hamısı həll olundu. FİFA da baxıb görər ki, bu qədər borclar bağlandı, bəlkə bizə güzəştə getsin. Ona görə belə fikir var ki, məsələ yenidən qaldırılsın.
- Bu, "İnter"ə yeni prezident təyin olunandan sonra gündəmə gəlib?
- Yox. Bu məsələ yeni prezidentdən qabaq da var idi. Nə vaxt müraciət olunacağını dəqiq deyə bilmərəm. Klubda yenidən rəhbər dəyişikliyi oldu və bəzi məsələlər açıq qalıb. Məsələn, təlim-məşq toplanışımızın harada keçirilməsi. Ancaq çox güman, xaricdə olmalıdır.
- Komandanızın nə yığışacağı məlumdur?
- Yanvarn 3-4-də Bakıda bir araya gələcəyik. Antalya təlim-məşq toplanışı alınsa, həmin vaxt ora gedərik. Onda getməsək də, yanvarın 9-10-da Türkiyəyə səfər etmək planımızda var. Bakıda hazırlığa başlayaq, ilk mərhələni keçək, sonra ikinci mərhələyə - yoxlama oyunları keçirmək üçün Antalyaya yollanaq.
- Neçə yoxlama oyunu keçirməyi planlaşdırırsınız?
- Üç matç. Tarixləri biz məşqçilər bilirik ki, nə vaxt oyun keçirmək istəyirik. Bu, yanvarın 13-17-i və 16-19-u olmalıdır. Antalyaya getsək, 3 gündən bir 3 oyun keçirmək istəyirik. Antalyaya 10 günlük yollanmaq, çempionata 1 həftə qalmış Bakıya qayıdıb hazırlığa başlamaq fikrindəyik. Hazırlıq planlarımıza qarşıdakı günlərdə aydınlıq gəlməlidir.
- Xaricə gedə bilməsəniz, gərək planlarızı bura ilə bağlı dəyişəsiniz, Bakıda özünüzə rəqib axtarasınız...
- Bəli. Ancaq Antalya toplanışımız olmalıdır. Çünki baş məşqçimiz Zaur Svanadze yeni rəhbərliklə danışıb, təlim-məşq olmalıdır. Yanvarın ilk günlərində də olmasa, 9-10-u reallaşmalıdır. Bu da ilk növbədə yoxlama oyunları üçün təşkil ediləcək.
Mehman SÜLEYMANOV
