"Hazırda "Beşiktaş”ın U-19 komandasının heyətində çıxış edirəm. Məşqlərimi ən yaxşı şəkildə edirəm ki, əsas komandaya qədər yüksələ bilim. Amma necə olacağını bilmirəm". Bunu Sportnet.az-a açıqlamasında Türkiyənin "Beşiktaş” klubunun və Azərbaycanın U-19 yığmasının futbolçusu Metin Gülər deyib.
Gülər yay transfer dövründə klubunu dəyişməsinin mümkünlüyünü dilə gətirib. Lakin o, indidən bu haqda danışmağın tez olduğunu söyləyib.
Gənc futbolçu U-21 yığmasının son toplanışına dəvət edilməməsini isə bu cür şərh edib: "Hər zaman Azərbaycan yığması üçün əlimdən gələni etməyə hazıram. Amma U-21 yığma komandasına məşqçilər korpusu məni dəvət etmədi. Nəyə görə çağırmadıqlarını bilmirəm. Baş məşqçi dəvət etsə, gələ bilərəm”.
