"Bizi seçmə mərhələdə çətin rəqiblə sonuncu ev oyunu gözləyir. Çexiya millisi son matçlarda uduzsa da, texniki baxımdan güclü kollektivdir. Lakin məqsədimiz yaxşı oyunla müsbət nəticə əldə etməkdir".
Sportnet.az-ın məlumatına görə, bunu Azərbaycan millisinin baş məşqçisi Robert Prosineçki 2018-ci il dünya çempionatının seçmə mərhələsi çərçivəsində Çexiya yığmasına qarşı oyundan əvvəl təşkil edilən mətbuat konfransında söyləyib.
Xorvatiyalı mütəxəssis bildirib ki, rəqibi yaxşı analiz ediblər. O, Çexiya millisinin yetərincə güclü tərəfləri olduğuna diqqət çəkib.
- Üç ildir Azərbaycandayam. Rəşad həmişə millidə yer alıb, kapitan olub. Penaltiyə gəlincə, buna icazə vermərəm. Niyə? Çünki birdən vura bilməsə necə olacaq? (gülür - red.)
- Motivasiyamız turnir cədvəlindəki vəziyyətimzdən asılı deyil, hər zaman yüksək olur. Sonuncu ev oyunumuzdur. Azarkeşlərimiz önündə müsbət nəticə qazanmaq istəyirik.
- Çexiyanın yaxşı heyəti var, Avropanın müxtəlif klublarında çıxış edirlər. Rəqib inkişafda olan komandadır. Bizi çətin oyun gözləyir. Lakin öz potensialımızı bilirik. Yaxşı nəticə qazanmağa çalışacağıq.
- Futbolçu həyatı belədir, hər şeyin bir sonu var. Rəşad həmin anın yetişdiyini hiss edib. O, Azərbaycan futbolunun görkəmli simalarından biridi. Futbol həyatı davam edir. Onu kimin əvəzləyəcəyinə gəlincə, hazırda bu suala cavab verə bilmərəm. Fikrimi qarşıdakı oyuna yönəltmişəm.
