"Qarabağ"ın futbolçusu Dino Ndlovu "İnter"lə Azərbaycan Premyer Liqasının VIII tur matçında zədələnib. Sportnet.az-ın məlumatına görə, xoşagəlməz olay uzatma dəqiqələrində baş verib.
Cənubi afrikalı hücumçu "İnter"in qapıçısı Səlahət Ağayevlə kapitan Denis Silva Kruz Silva arasındakı anlaşmazlıqdan sonra topu tora göndərib. Bu zaman Denis Silva ona mane olmaq istəyib. Nəticədə Ndlovu ayağından xəsarət alıb. Həkim müdaxiləsindən sonra o, meydanı axsaya-axsaya tərk edib.
Ağayevlə Denis Silva isə qoldan sonra mübahisə ediblər. Onlar bir-birilərini topa tez çıxmaqda ittiham ediblər.
Qeyd edək ki, Dino Ndlovu hər iki qolun müəllifi olub.
