Tofiq Bəhramov adına Respublika stadionunun ot örtüyü tam döşənilib. Bu barədə Sportnet.az-a mərkəzi arenanın direktoru Akif İsmayılov məlumat verib.
Onun sözlərinə görə, bu gün ot örtüyünün xətləri çəkiləcək və digər tamamlama işləri görüləcək. Eyni zamanda iş icraçısı, AFFA nümayəndəsi və digər rəsmi şəxslərin iştirakı ilə stadionun qəbul edilməsi barədə akt tərtib ediləcək. Daha sonra sentyabrın 17-də UEFA nümayəndəsi stadiona baxış keçirərək, arenanın oyuna yararlı olub-olmadığına dair qərar verəcək.
Yenilənmiş meydanda ilk oyun Avropa Liqasının qrup mərhələsində "Qarabağ"la Fransa "Sent Etyen"i arasında sentyabrın 18-də keçiriləcək. Bundan bir gün öncə isə komandalar matç öncəsi son məşqə çıxacaqlar. "Qarabağ"ın məşqi saat 18:45-də, "Sent Etyen"inki saat 20:00-da başlanacaq.
Qeyd edək ki, Azərbaycan və Fransa təmsilçiləri arasındakı qarşılaşma saat 21:00-da başlanacaq.
