"Sumqayıt"ın futbolçusu Xəyal Nəcəfov sosial şəbəkə vasitəsilə sualları cavablandırıb. Sportnet.az həmin müsahibəni təqdim edir...
- Futbola gəlişin barəsində məlumat verərdin. İlk məşqçin kim olub?
- 7 yaşım olarkən Sumqayıt şəhərində futbola yazılmışam. İlk məşqçim Tağı Məmmədov olub. 10 yaşım olarkən isə "Sumqayıt" Futbol Klubunun akademiyasına seçilmişəm. Akademiyamızda olarkən Zaur Hidayətov və Vəfadar Quliyevdən futbolun sirrlərini öyrənmişəm. Daha sonra əvəzedici, ardından isə əsas komandaya yüksəlmişəm.
- Bir gün "Sumqayıt"dan ayrılsan, hansı klubda oynamaq istərdin?
- "Sumqayıt"dan ayrılsam, yalnız ölkə xaricində çıxış etmək istərdim.
- Hər zaman pozitiv olmağı necə bacarırsan?
- Həqiqətən nə cavab verəcəyimi bilmirəm.
- Xəyalındakı klub hansıdır?
- "Mançester Yunayted".
- Messi, yoxsa Ronaldu?
- Hər ikisi sözsüz ki, dünyanın ən güclüsüdür. Amma mənin seçimim nə Messidir, nə də Ronaldu.
- Növbəti mövsüm başqa kluba getmək fikrin var?
- Gələcəklə bağlı plan qurmağı sevmirəm.
- Türkiyə Super Liqasında azarkeşlik etdiyin klub hansıdır?
- "Qalatasaray"a azarkeşlik edirəm.
- Əsas heyət üzvünə çevrilməyində limitin rolu çoxdur, yoxsa...
- Bu sualı mənə çox ünvanlayırlar. Gəlin, unutmayaq ki, ötən mövsüm də əsas heyətdə çıxış edirdim. Onda ki, limitə düşən fubolçu deyildim.
- Karyeranı "Sumqayıt"da bitirməyi istəyirsən?
- Hələ gəncəm. Karyeramın sonu haqqında nəsə düşünməmişəm.
- Kumirin kimdir?
- "Mançester Siti" və İspaniya millisinin yarımmüdafiəçisi David Silvanın oyununu çox bəyənirəm. Kumirim deməsəm də, bəzi hərəkətlər var ki ondan götürməyə çalışıram.
- Avropa Liqasına düşmək üçün "Sumqayıt"ın şansı nə qədərdir?
- Daha yüksək yerlər üçün bütün komanda olaraq çalışırıq. Faiz etibarilə heç nə deyə bilmərəm.
- Milli komandada oynamağı arzulayırsan?
- Millidə oynamaq hər bir futbolçunun arzusudur. U-19 millimizdə Nazim Süleymanov, U-21-də isə Yaşar Vahabzadə və Samir Ələkbərovun rəhbərliyi dövründə çıxış etmişəm. Amma ən böyük arzum əsas millidə çıxış etməkdir. Düşünürəm ki, bu arzumu reallaşdırmaq öz əlimdədir. Üzərimdə çalışsam və daha az səhv etsəm, bu iş mənim üçün daha da asanlaşar.
- Öz mövqeyində oynayan ən bəyəndiyin futbolçu kimdir?
- David Silva və Məsut Özil.
- Ayda nə qədər məvacib alırsan?
- Azarkeşlərimiz tərəfindən ünvanlanan ənənəvi sualınıza belə cavab verəcəyəm: Özümə yetəcək qədər maaş alıram.
- "Qarabağ"ı çıxmaqla, Azərbaycanın ən güclü klubu hansıdır?
- "Sumqayıt".
- Özünü peşəkar futbolçu sayırsan?
- Hər hansı bir uğur əldə etməmişəmsə, peşəkarlıqdan danışmaq istəməzdim.
- Bu günə kimi Premyer Liqada gördüyün ən səviyyəli futbolçu kimdir?
- "Qarabağ"ın yarımmüdafiəçisi Riçard Almeyda.
- Futbolu və "Sumqayıt"ı seçməkdə məqsədin?
- Sumqayıtda doğulduğum üçün futbola bu şəhərdə başlamışam. Futbolu seçməkdə əsas məqsədim isə təbii ki, bu idman növünə olan sevgidəndir.
- "Qarabağ"da oynamaq istərdin?
- Məncə, hər bir azərbaycanlı futbolçu "Qarabağ”da oynamaq istəyər.
- Bu mövsüm "Sumqayıt"dakı məqsədiniz nədir?
- Komanda olaraq əlimizdən gələni etməyə çalışırıq ki, daha üst pillələrdə qərarlaşaq.
- Səncə, hazırda Premyer Liqada "Xəzər Lənkəran"ın yerini tutan klub varmı?
- Məncə, yox.
- "Sumqayıt"ın ən sürətli futbolçusu kimdir?
- Ehtiram Şahverdiyev.
- "Sumqayıt" azarkeşlərinə nə demək istərdin?
- Bütün sumqayıtlı azarkeşlərə bizi dəstəklədikləri üçün minnətdarlığımı bildirirəm. Əlimizdən gələndən daha artığını etməyə çalışırıq ki, daim onları sevindirək.
