Topaz Premyer Liqasında XXV turun son oyunu keçirilib.
Sportnet.az-ın məlumatına görə, "Kapital Bank Arena"da "Sumqayıt" və"Səbail" komandaları qarşılaşıb. Görüş qonaqların 2:1 hesablı qələbəsi ilə yekunlaşıb.
"Səbail" hər iki qolu ilk yarıda vurub. 30-cu dəqiqədə Faruk Mika, bundan 8 dəqiqə sonra Aqşin Qurbanlı fərqlənib.
"Sumqayıt"ın təsəlli qoluna ikinci hissədə meydana daxil olmuş Amil Yunanov 76-cı dəqiqədə imza atıb.
Bununla da xallarını 23-ə çatdıran "Səbail" 7-ci pillədə qalsa da, 13 xalla sonuncu pillədəki "Kəpəz"in I Diviziona enişini rəsmiləşdirib. "Sumqayıt" isə "Neftçi" və "Zirə"nin məğlubiyyətlərindən yararlana bilməyib. Hazırda bu komanda 39 xalla 3-cü pillədə olsa da, mövqeyini itirmə təhlükəsi ilə üz-üzədir.
Qeyd edək ki, turun ilk 2 oyun günündə hər 3 qarşılaşmaşda 3 qol vurulub. "Qarabağ" səfərdə "Zirə"yə, "Keşlə" evdə "Neftçi"yə 2:1, "Qəbələ" isə doğma meydanda "Kəpəz"ə 3:0 hesabı ilə qalib gəlib.
----------------
Bu gün futbol üzrə Topaz Premyer Liqasında XXV turun son oyunu keçiriləcək.
Sportnet.az xəbər verir ki, "Kapital Bank Arena"da "Sumqayıt" "Səbail"i qəbul edəcək. 24 oyundan sonra "Sumqayıt" 39 xalla 3-cü, "Səbail" isə 20 xalla 7-ci pillədə qərarlaşıb. Bugünkü oyundakı istənilən hesab komandaların turnir cədvəlindəki mövqelərinə təsir göstərməyəcək. Turun ilk 2 oyun gününün nəticələri bu qarşılaşmanın aktuallığını 2 səbəbdən artırıb.
Əvvəla, "Sumqayıt" qalib gəlsə, ən yaxın izləyicisi "Neftçi"dən 5 xal aralanacaq. Bununla da Samir Abasovun baş məşqçi olduğu kollektiv həm bürünc medalları, həm də tarixində ilk dəfə avrokubok vəsiqəsini böyük ölçüdə təmin edəcək. Digər tərəfdən, "Səbail" qalib gəlsə, xallarını 23-ə çatdıracaq və bununla da 13 xalla sonuncu yerdə gedən "Kəpəz"in, reqlamentə əsasən, I Diviziona enişi rəsmiləşəcək.
İki komanda arasında indiyədək 3 görüş keçirilib. Bu mövsümə təsadüf etmiş qarşılaşmaların 2-də "Sumqayıt" qalib gəlibsə, 1 oyunda heç-heçə qalib gəlib. Bu görüşlərdə meydan sahibi olan komandalar qol vura bilməyib. "Səbail” indiyədək qələbə qazanmayıb və qol vurmayıb. Topların nisbəti 3:0 "Sumqayıt"ın xeyrinədir.
Topaz Premyer Liqası, XXV tur
29 aprel (bazar)
19:00. "Sumqayıt” – "Səbail” 1:2
Qollar: Amil Yunanov, 76 - Faruk Miya, 30. Aqşin Qurbanlı, 38
Hakimlər: Rəvan Həmzəzadə, Rza Məmmədov, Azər Əsgərov, Ramil Diniyev
AFFA nümayəndəsi: Ramiz Abdullayev
Hakim-inspektor: Kərim Ağayev
"Kapital Bank Arena”
Qeyd edək ki, turun ilk 2 oyun günündə hər 3 qarşılaşmaşda 3 qol vurulub. "Qarabağ" səfərdə "Zirə"yə, "Keşlə" evdə "Neftçi"yə 2:1, "Qəbələ" isə doğma meydanda "Kəpəz"ə 3:0 hesabı ilə qalib gəlib.
