"Çempionatda böyük rəqabətin oldunu hər kəs gördü. Eyni xala malik iki komandanın duelində uşaqlar vuruşdular, mübarizə apardılar. Hər iki komandanı təbrik edirəm. "Qarabağ"da da çox yaxşı komanda formalaşıb, yaxşı futbolçulara malikdir. Nəticədə Azərbaycan futbolu qazanır. Bu uşaqlarda Azərbaycanın bütün yaş qrupları üzrə yığma komandalarında oynamaq və ölkəmizin adını ucaltmağa qadirdirlər".
Sportnet.az-ın məlumatına görə, bunu AFFA Gənclər Liqasının qalibi olan "Qəbələ"nin U-19 komandasının baş məşqçisi Famil Xəlilov deyib. Gənc mütəxəssis jurnalistlərin suallarını da cavablandırıb...
- UEFA Gənclər Liqasında bu heyətlə mübarizə aparacaqsız. Legioner futbolçunun transferini tələb edəcəksiz?
- Düşünmürəm ki, bizə legioner lazım olsun. Çünki akademiyamızda yetərincə istedadlı futbolçu var. Onlardan faydalansaq, daha yaxşı olar.
- Çempionatı məğlubiyyətsiz başa vurdunuz. Bu da futbolda az-az hallarda rast gəlinir...
- Bunu uşaqların UEFA Gənclər Liqasında nə dərəcədə istəkli olmalarına bağlayardım. Buna inanaraq, sonadək mübarizə apardılar və çempion oldular.
- Amma finala layiq oyun görmədik...
- Futbolçulara xüsusi tapşırıq verməmişdik. Sadəcə, mübarizə aparmaq, normal futbol oynamağı tapşırmışdıq. Müdafiədə oturmaq kimi niyyətimiz yox idi. Sadəcə, futbolçular öz üzərlərində nə qədər ağır yükün olduğunu bilirdilər. "Qarabağ” güclüdür, istedadlı futbolçuları var. Onlara boş zonalar verməmək lazım idi. Futbolçularımız belə oynamağa üstünlük verdilər.
- Məhəmməd Abbaslını oyuna daxil etdikdən 5-6 dəqiqə sonra əvəzlədiniz. Bu, nə ilə bağlı idi?
- Məhəmməd istedadlı oyunçudur. Sadəcə, ayağında ağrı olduğu hiss edildi. Meydanda olduğu vaxt çox hərəkətsiz olduğu hiss edildi. Ola bilsin, əvvəlki zədəsi təkrarlanıb. Tez əvəzlədik ki, həm meydanda sayımız azalmasın, həm də futbolçumuzu itirməyək.
- Bu gün siz Azərbaycan futbolunda ad qoymuş Rəşad Sadıqov üzərində qələbə qazandız. Bu, sizin üçün stimul sayılır?
- İlk növbədə, futbolçularımla fəxr edirəm ki, tapşırıqlarımı yerinə yetirdilər. "Qarabağ” haqda onu deyə bilərəm ki, çox gözəl kollektiv formalaşdırıblar, yaxış heyətləri var. Rəşad müəllimi də buna görə təbrik edirəm. Həqiqətən də çox istedadlı futbolçulara malikdirlər.
