"Çox sevincliyik. 11 oyundur qalib gələ bilmirdik. Nəhayət, "qara zolaq”dan çıxa bildik. 11 qarşılaşmada qalib gəlmədikdən sonra 3 matçda qələbə qazanmaq, doğrudan da çox çətin idi. Bu, bizə çox lazım idi. İndi Avropa Liqasına vəsiqəni gözləyəcəyik".
Sportnet.az xəbər verir ki, bunu "Zirə"nin futbolçusu Tellur Mütəllimov səfərdə "Sumqayıt"ı 2:1 hesabı ilə yenərək, 4-cü yeri tutduqları Topaz Premyer Liqasının XXVIII tur matçından sonra jurnalistlərə müsahibəsində deyib. Gənc müdafiəçi digər sualları da cavablandırıb...
- Fasilədə nə dəyişdi: Baş məşqçi Ayxan Abbasov sizə hansı tövsiyələri verdi?
- Baş məşqçi yalnız onu dedi ki, bu oyunu udmalıyıq. Bizim başqa şansımız yox idi. Ya heç-heçə etməli, ya da qalib gəlməli idik. Bizə motivasiya verdi ki, bu oyunu uduzmamalıyıq. Nəinki uduzmamaq, hətta qalib gəldik.
- Gəncədəki oyundan xəbəriniz var idi?
- Yox, xəbərimiz yox idi. Yalnız əvvəlcə 1:1 hesabını, daha sonra isə 1:2-ni eşitdim. Düzdür, 3-cü ola bilmədik, lakin 4-cü yer də yaxşıdır.
- Gələcəyini "Zirə”də görürsən?
- Klubla iki illik müqaviləm var. İndi fikrim ancaq "Zirə”də qalıb, burda öz işimi görməkdir. İki ildən sonra görək, nə olur.
- Qəbələyə gedib, Azərbaycan Kubokunun finalını izləməyi düşünmürsən?
- Belə fikrim var, getmək istəyərdim. "Qəbələ” də mənə doğma klubdur. Məncə, həmin oyunu izləməyə dəyər.
- Bu oyun üçün proqnozun nədir?
- Bu, futboldur. Əvvəlcədən heç nə demək olmur. "Qəbələ”nin futbolçularının ustalıq səviyyəsi yüksəkdir. Lakin "Keşlə” də zəif komanda deyil. Bu komanda qışdan sonra çox güclənib. Yəni, belə deyək, "dişi canavar” yox, "dişli canavar”dır (gülür). "Qəbələ” üçün çətin olacaq. Hər iki komandaya uğurlar arzulayıram. Bir də onu deyim ki, "Sumqayıt”ın baş məşqçisi Samir Abasov çox yaxşı komanda yığıb, onlar da gələcək qarşılaşmalarda uğurlar arzu edirəm.
