Yeni transferi Erveyn Mukam Belarusun BATE klubunun "Qarabağ"la keçirdiyi Çempionlar Liqasının III təsnifat mərhələsinin cavab oyununu dəyərləndirib. Sportnet.az-ın məlumatına görə, fransalı yarımmüdafiəçi 1:1 hesabı ilə yekunlaşan matçın çox çətin alındığını bildirib.
24 yaşlı oyunçu çətinliklərə baxmayaraq, bütövləşərək, bir-biri uğrunda vuruşmalarını sevindirici hal kimi dəyərləndirib. Onun fikrincə, əsl komanda belə olmalıdır.
Qeyd edək ki, BATE ilk görüşdə 1:0 hesabı ilə qalib gəldiyi üçün Çempionlar Liqasının "pley-off" mərhələsinə yüksəlib. Belarus təmsilçisinin növbəti rəqibi Hollandiya PSV-si olacaq. "Qarabağ" isə Avropa Liqasının "pley-off" mərhələsində "Şerif" (Moldova) - "Valür" (İslandiya) cütünün qalibi ilə görüşəcək. Moldovadakı ilk matçda "Şerif" 1:0 hesabı ilə qalib gəlib. İslandiyadakı cavab oyunu avqustun 16-da olacaq.
