"Qarabağ" klubunun Avropa Liqasının "pley-off" mərhələsindəki rəqibi müəyyənləşib.
Sportnet.az-ın məlumatına görə, bu, Moldovanın "Şerif" komandasıdır. Tiraspol şəhərinin təmsilçisi Avroliqanın III təsnifat mərhələsində İslandiya "Valür"ünü mübarizədən kənarlaşdırıb. Ötən həftə Moldovadakı ilk görüşdə 1:0 hesabı ilə qalib gələn Qoran Sabliçin baş məşqçi olduğu kollektiv cavab oyununda uduzub - 1:2. Hesabı 40-cı dəqiqədə islandiyalı Haukur Pall Siqurdsson açıb. 68-ci dəqiqədə isə Zigi Badibanqa bərabərlik qolunu vurub. 90+1-ci dəqiqədə Kristinn İngi Halldorsson "Valür"ün qələbə topunu vurub. Lakin Moldova komandası səfər qolu sayəsində mərhələ adlayıb.
Beləliklə, "Qarabağ"la "Şerif" ardıcıl ikinci mövsüm avrokuboklarda bir-birinə rəqib olub. Ötən mövsüm Çempionlar Liqasının III təsnifat mərhələsinə təsadüf edən görüşdə Azərbaycan komandası iki oyunun nəticəsində qalib gəlib - 0:0, 2:1. Həmin vaxt Moldova komandasının baş məşqçisi hazırda "Neftçi"nin sükanı arxasındakı Roberto Bordin olub.
"Qarabağ"la "Şerif" arasında budəfəki qarşılaşmalar avqustun 23-də Tiraspolda, avqustun 30-da Bakıda keçiriləcək.
