Bu il paytaxtın "Bakı" klubu 10 illik yubileyini qeyd edir. Sportnet.az-ın məlumatına görə, bu barədə klubun prezidenti Hafiz Məmmədov AFFA-nın rəsmi saytına açıqlamasında bildirib.
O, bildirib ki, bununla bağlı tədbir keçiriləcəyi və 3-4 xarici klubun Azərbaycana gələcəyi planlarında var.
"Yubiley ilinin qeyd olunması ilə əlaqədar lazımi tədbirlər təşkil edəcək komissiya yaradacağıq. Məqsədimiz var ki, 10 illik yubileyi yüksək səviyyədə keçirək. Müəyyən planlarımız var. İndidən açıqlamaq istəmirəm. Yaxın günlərdə bununla bağlı ictimaiyyətə məlumat verəcəyik. Yubiley tədbiri çərçivəsində xaricdən 3-4 klub dəvət edib burada yoldaşlıq görüşləri təşkil etmək istəyirik".
Qeyd edək ki, klub 1997-ci ildə "Polis Akademiyası" və "Qartal-95" klublarının birləşməsindən yaranıb.1997-ci ildə "Polis Akademiyası", 1997-2000-ci illərdə "Dinamo" adlandırılıb. 2000-2001-ci illərdə "Bakılı" Futbol Klubu ilə birləşib və "Dinamo-Bakılı" adlandırılıb. 2004-cü ildən etibarən klubu "BAGHLAN GROUP" şirkətlər qrupu himayəyə götürüb. Elə həmin ildən də klubun adı dəyişdirilərək "Bakı" adlandırılıb.
